मीरा भाईंदर (ठाणे) - टाळेबंदीच्या शिथिलतेनंतर मिरा भाईंदर शहरातील नागरिक मोठ्या प्रमाणात कामांवर ये-जा करण्यासाठी बस सेवांचा वापर करतात. परंतु, महानगरपालिकेची स्वतंत्र परिवहन सेवा उपलब्ध असतानादेखील नागरिकांना वाहतुकीच्या समस्यांचा सामना करावा लागत आहे. त्यामुळे संताप व्यक्त करण्यात येत आहे. शिवाय परिवहन सेवाच ठप्प करण्यात आल्यामुळे पालिकेचे लाखो रुपयांचे नुकसान होत असल्याचे आरोप करण्यात आले आहेत.
राज्य शासनाकडून टाळेबंदी नियमात शिथिलता करण्यात आल्यानंतर मोठ्या प्रमाणात व्यावसायिक आणि नोकरदार वर्गाची रहदारी सुरु झाली आहे. रिक्षा व इतर वाहतूक सेवा खर्चिक असल्यामुळे दळणवळण करण्यासाठी बस सेवेचा वापर मोठ्या प्रमाणात होत आहे. परंतु, अपुऱ्या प्रमाणात असेलेली बससंख्या आणि वेळ वाया जात असल्यामुळे नागरीक त्रस्थ झाले आहेत. अशा परिस्थितीत मिरा भाईंदर महानगरपालिकेची स्वतंत्र परिवहन सेवा उपलब्ध असतानादेखील तिचा उपभोग करण्यात येत नसल्यामुळे प्रवासी वर्गाकडून संताप व्यक्त करण्यात येत आहे.
मिरा भाईंदर महानगरपालिकेच्या परिवहन विभागात ७० बस उपलब्ध आहेत. शिवाय ३३८ कर्मचारी या विभागात कार्यरत आहेत. गेल्या वर्षी महासभेत परिवहन सेवा 'भागीरथी एमबीएमटी प्रा.लिमिटेड' या कंपनीला ठेकेतत्वावर चालवण्यास देण्याचा निर्णय घेण्यात आला होता. या मोबदल्यात पालिकेला प्रति किलोमीटर मागे ३६ रुपये प्राप्त होणार असल्याचे नक्की करण्यात आले होते. २२ मार्च रोजी टाळेबंदी नियम लागू करण्यात आल्यामुळे प्रवाशांकरिता परिवहन सेवा बंद करण्याचा निर्णय प्रशासनामार्फत घेण्यात आला होता. ५ जून रोजी राज्य शासनाकडून टाळेबंदी नियमात शिथिलता आण्यात आल्यानंतर परिवहन सेवा नव्याने सुरु होणार असल्याची आशा प्रवासी वर्गामध्ये निर्माण झाली होती. परंतु, अद्यापही परिवहन सेवा ठप्पच असल्यामुळे प्रवाशांमध्ये नाराजी पसरली आहे.
मिरा भाईंदर शहरातील अनेक नागरिक दळणवळणाकरिता परिवहन सेवेचा वापर करतात. सध्या परिवहन सेवा कार्यरत नसल्यामुळे जवळच्या अंतरावरील प्रवास करण्याकरता नागरिकांना बीएसटी बस सुविधेवर अवलंबून राहावे लागत आहे. शिवाय बीएसटी बस संख्या अपुऱ्या प्रमाणात उपलब्ध असल्यामुळे नागरिकांचा बराच वेळ वाया जात आहे. त्यामुळे लवकरात लवकर परिवहन सेवा वापरात आणावी, अशी मागणी करण्यात येत आहे.
परिवहन सेवा सुरु करण्याबाबत लोकप्रतिनिधींनकडून मागणी करण्यात येत असल्यामुळे पालिकेमार्फ़त ठेकेदाराला सेवा सुरु करण्याच्या सूचना देण्यात आल्या आहेत. परंतु, सोशल डिस्टन्सचे पालन करत सेवा उपलब्ध केल्यास आपल्याला नुकसान सहन करावे लागणार आहे. मिरा भाईंदर महानगरपालिकेला परिवहन सेवेमार्फत लाखो रुपयांचे उत्त्पन्न प्राप्त होत असते. परंतु, करोनामुळे परिवहन सेवाच ठप्प झाल्यामुळे पालिकेला आर्थिक नुकसान सहन करावे लागत आहे. लवकरच सेवा सरू न केल्यास याचा गंभीर परिणाम परिवहन सेवेवर होण्याची भीती व्यक्त करण्यात येत आहे.
परिवहन सेवा बंद ठेवणे अत्यंत चुकीचे आहे. यामुळे पालिकेचेच आर्थिक नुकसान होत आहे. ठेकेदाराला शक्य नसल्यास योग्य पर्याय निवडून लवकरच सेवा सुरु करण्यात यावी, अशी मागणी माजी नगरसेवक राजू वेतोसकर यांनी केली आहे.
इतर महानगरपालिकेच्या परिवहन सेवा सुद्धा बंद आहेत. मुंबई महानगरपालिका चांगले अनुदान मिळत आहे. त्यामुळे बेस्टच्या बस सुरू आहेत. सध्या मीरा भाईंदरमध्ये अत्यावश्यक सेवेसाठी 8 बस धावत आहेत. महानगरपालिकेसोबत चर्चा सुरू असून, लवकरच निर्णय घेऊ अशी प्रतिक्रिया भागीरथी कंपनीचे (ठेकेदार) संचालक मनोहर सकपाळ यांनी ईटीव्ही भारतला सांगितले.
लवकरच परिवहन सेवे संदर्भात निर्णय घेण्यात येईल. ठेकेदारांसोबत पत्रव्यवहार तसेच बोलणे सुरू आहे. शासनाचे निर्देश तपासून आयुक्तांची मान्यता घेऊन तसेच परिवहन विभागाची परवानगी घेऊन पुढील निर्णय घेऊ. अत्यावश्यक सेवेसाठी बस सुरू आहेत. लवकरच सामान्य नागरिकांसाठी सेवा उपलब्ध करून देण्यात येईल अशी प्रतिक्रिया उपायुक्त अजित मुठे यांनी ईटीव्ही भारतला दिली.
