ठाणे : महापालिकेच्या छत्रपती शिवाजी महाराज रुग्णालयात झालेल्या 18 मृत्यूंच्या प्रकरणाची चौकशी केली जातेय. यासाठी सरकारने 9 सदस्यांची चौकशी समिती नेमली आहे. या समितीची पहिली बैठक ठाणे महापालिकेच्या अरविंद पेंडसे सभागृहात झाली. ही बैठक जवळपास 5 तास चालली.
10 दिवसात अहवाल मागितला : मागील आठवड्यात ठाणे महापालिकेच्या कळवा रुग्णालयात एकाचदिवशी 18 रुग्णांचा मृत्यू झाला होता. तर आठवड्याभरात 27 रुग्ण दगावले. या मृत्यू प्रकरणामुळे कळवा रुग्णालय विरोधी पक्षाच्या टार्गेटवर आले होते. त्यानंतर स्वतः मुख्यमंत्री एकनाथ शिंदे यांनी कळवा रुग्णालयात जाऊन परिस्थितीचा आढावा घेतला. रुग्णांशी संवाद साधून मुख्यमंत्र्यांनी परिस्थिती जाणून घेतली होती. त्यानंतर या संपूर्ण प्रकरणाची चौकशी करण्यासाठी शासनाने 9 सदस्यांची समिती स्थापन केली. मुख्यमंत्री एकनाथ शिंदेंनी या चौकशी समितीला 10 दिवसांत अहवाल सादर करण्याचे आदेश दिलेत. त्यानंतर चौकशी समितीच्या वतीने तातडीने हालचाल सुरू करण्यात आली. या समितीची पहिलीच बैठक पार पडली असून सुमारे 5 तास ही बैठक सुरू होती. या बैठकीत मृत्यूंच्या कारणासोबतच इतर महत्वाच्या गोष्टींवरही चर्चा झाली. बैठक संपल्यानंतर समितीच्या सदस्यांनी कळवा रुग्णालयात जाऊनही रुग्णालयाची परिस्थिती जाणून घेतली. येत्या 10 दिवसांत म्हणजेच 25 ऑगस्टपर्यंत समिती अहवाल सादर करणार आहे.
राज्य आरोग्य आयुक्त काय म्हणाले : मृत्यू प्रकरणाचा आढावा घेण्याचे काम सुरू आहे. सखोल चौकशी करून अहवाल सादर केला जाईल. नेमकं या ठिकाणी काय घडलं? मृत्यूची कारणं काय? यातील दोष काय? याचाही तपास सुरू असल्याची माहिती यावेळी राज्य आरोग्य आयुक्त डॉ. धीरज कुमार यांनी दिली. चौकशी समितीच्या बैठकीत आरोग्यसेवा आयुक्त, जिल्हाधिकारी अशोक शिनगारे, महापालिका आयुक्त अभिजित बांगर, आरोग्यसेवा संचालनालय मुंबई विभागाचे संचालक, जिल्हा शल्य चिकित्सक डॉ. कैलास पवार, आरोग्य सेवा सहसंचालक, सहाय्यक संचालक आदी समिती सदस्य उपस्थित होते.
हेही वाचा-
