ठाणे : तक्रारदार इंदू रणधीर सिंह (वय, ४२) ह्या भिवंडी तालुक्यातील कोनगाव मधील पिंपळास रोड वर असलेल्या सिद्धेश्वर पार्क मधील डी विंगच्या तिसऱ्या मजल्यावर राहतात. तर आरोपी पिंकी ही कोनगाव येतील नाईकवाडी भागात असलेल्या गिरधर नगरमध्ये राहते. दोघी एकाच मूळ राज्यातील असल्यामुळे त्यांच्यात ओळख होऊन मैत्री झाली. दोघीही एकमेकांच्या घरी येत जात होत्या. त्यातच तक्रादार इंदू यांच्या घरातील कपाटातून ११ ते १८ जानेवारी दरम्यान २ लाख ९१ हजार ५०० रुपयांचे दागिने चोरी झाल्याचे त्यांच्या लक्षात आले. त्यानंतर त्यांनी कोनगाव पोलीस ठाण्यात १९ जानेवारी रोजी अज्ञात चोरट्या विरोधात गुन्हा दाखल केला.
आरोपी पिंकी कर्जबाजारी : गुन्ह्याचे गांभीर्य ओळखून त्यानुषंगाने कोनगाव पोलीस ठाण्याचे वरिष्ठ पोलीस निरीक्षक राजेंद्र पवार यांच्या मार्गदर्शनाखाली तपास पथकाचे सहाय्यक पोलीस निरीक्षक अभिजीत पाटील, महिला पोलीस उपनिरीक्षक अस्लेशा घाटगे, पो.ह. अरविंद गोरले, अमोल गोरे, पोना गणेश चोरगे, नरेंद्र पाटील या पोलीस पथकाने तपास सुरू केला. चोरट्याचा कुठलाही सुगावा नसल्याने तक्रारदार इंदू यांच्याकडून घरातील नातेवाईक आणि मैत्रिणीची माहिती गोळा करून त्या दिशेने तपास सुरू केला. तपास दरम्यान आरोपी पिंकी ही कर्जबाजारी असल्याचे समोर आल्याने १९ जानेवारी रोजी पोलीस पथकाने तिला संशयित म्हणून तिची चौकशी सुरू केली.
५३ ग्रॅम वजनाचे चोरीचे दागिने जप्त : या चौकशी दरम्यान पिंकीने कर्जबाजारी झाल्याने कर्ज फेडण्यासाठी दागिने चोरल्याची पोलिसांना कबुली दिली. तिने कल्याण पश्चिम भागातील संतोषी माता रोड वरील मोक्ष ज्वेलर्समध्ये चोरीचे दागिने विकल्याचे सांगितले. त्यानंतर पोलीस पथक तातडीने मोक्ष ज्वेलर्स दुकानात दाखल झाले आणि दुकानाचे मालक नरेंद्र सरदारमल जैन (वय, ५८) यांच्याकडून २ लाख ९१ हजार ५०० रुपयांचे ५३ ग्रॅम वजनाचे चोरीचे दागिने जप्त केले.
ज्वेलर्सचे मालकही आरोपी : दागिने चोरीच्या गुन्ह्यात मोक्ष ज्वेलर्सचे मालक नरेंद्र जैन यांनाही आरोपी करण्यात आल्याची माहिती तपास अधिकारी सपोनि अभिजीत पाटील यांनी दिली आहे. आरोपी पिंकीला भिवंडी न्यायालयात आज दुपारच्या सुमारास हजर करण्यात येणार असल्याचे सांगितले. या गुन्ह्याचा पुढील तपास सपोनि अभिजीत पाटील करीत आहेत.
हेही वाचा : Nashik Crime: नाशिकमध्ये शिंदे-ठाकरे गटात राडा; हवेत केला गोळीबार, एक जण ताब्यात
