ठाणे - एका तरुणाला विवस्त्र करून मारहाण केल्याचा धक्कादायक प्रकार समोर आला आहे. आपण किती मोठे भाई आहोत, हे सिद्ध करण्यासाठी काही गुंडानी एका तरुणाला विवस्त्र करुन बेदम मारहाण केली. ही घटना श्रीनगर पोलीस ठाण्याच्या हद्दीत घडली. आश्चर्याची गोष्ट म्हणजे मारहाण करणाऱ्या पाच तरुणांपैकी दोन तरुण अल्पवयीन आहेत. त्यांनी नुकतीच दहावीची परीक्षा दिली आहे.
श्रीनगर पोलीस ठाण्याच्या हद्दीत भर चौकात या तरुणाला मारहाण करण्यात आल्याची ही घटना १२ जूनला घडली होती. अमका भाई माझा बॉस आहे, असे जोपर्यंत बोलत नाही तोपर्यंत मारणार, या प्रकारचा व्हिडिओ व्हायरल झाला. ही मारहाण पाहून कोणी ही त्या तरुणाला वाचवण्यास मध्ये पडले नाही. या मारहाणीमुळे तो तरुण इतका घाबरला होता की तो पोलिसात तक्रारही करायला घाबरत होता.
मात्र, व्हायरल झालेला हा व्हिडिओ पोलिसांच्या हाती लागल्यावर त्यांनी या व्हिडिओची शाहनिशा केली. ज्या कथित भाईचे नाव मारहाण करताना ते गुंड घेत आहेत, त्यांचा शोध पोलिसांनी घेतला. तपासादरम्यान, त्या गुंडांवर आधीच ७ छोटे-मोठे गुन्हे दाखल असल्याचे समोर आले आहे. अधिक तपास केला असता ज्या कथित भाईच्या सांगण्यावरून हे ५ गुंड त्या तरुणाला मारहाण करत होते, त्यापैकी २ गुंड हे अल्पवयीन आहेत. तर उरलेल्या ३ गुंडांवर देखील १-२ गुन्हे दाखल असल्याची माहिती पोलिसांनी दिली.
या प्रकरणी पोलिसांनी दोन गुंडांना अटक केली आहे. तर कथित भाईसह ४ जणांचा तपास करत आहेत.
