सोलापूर- अंत्यविधी करण्यासाठी दफनभूमी उपलब्ध नव्हती. त्यामुळे जिल्हाधिकारी कार्यालयाच्या प्रवेशद्वारावर मृतदेह ठेवण्याचा बेत असणाऱ्या आंदोलकांना पोलिसांनी वाटेतच अडविल्याचा प्रकार समोर आला आहे. दफनभूमीच्या मागणीसाठी बार्शी तालुक्यातील आंदोलक मृतदेहासह सोलापूरला येत होते. मात्र ग्रामीण पोलिसांनी त्यांना शहरापासून १० किलोमीटर त्यांची शववाहिका रोखून धरली. त्यानंतर आंदोलनकर्त्यांनीही त्याच ठिकाणी आंदोलन सुरू केले आणि दफनभूमीची मागणी लावून धरली.
बार्शी तालुक्यातील तांदुळवाडी येथे अल्पसंख्याक मुस्लीम समाजाच्या दफनविधीसाठी पुनर्वसन गावाच्या ठिकाणी जागा उपलब्ध नव्हती. या मागणीकरिता या गावातील चाँद गुलाब शेख यांच्यासह अन्य ग्रामस्थ शासन दरबारी प्रयत्नशील होते. मात्र त्यांच्या मागणीकडे जिल्हा प्रशासन आणि जिल्ह्याच्या पुनर्वसन शाखेने दुर्लक्ष केले. त्यामुळे त्यांची ही मागणी शासन दरबारी धूळखात पडली होती. परिणामी गावातील मुस्लिमांना दफनविधीसाठी १५ ते १६ किलोमीटर अंतरावर असलेल्या बार्शी येथील दफनभूमी शिवाय पर्याय नव्हता. त्यामुळे गावाच्या ठिकाणी शासनाने २० गुंठे जागा उपलब्ध करून द्यावी, अशी ग्रामस्थांची मागणी होती.
दफनभूमीच्या मागणीसाठी शासन दरबारी पाठपुरावा करणारे चाँद शेख यांचे झाले निधन
दरम्यान मौलाना आझाद विचार मंचच्या जिल्हा पातळीवरील पदाधिकाऱ्यांनी देखील या दफनभूमीच्या मागणीसाठी आंदोलने सुरू केली होती.त्यात चाँद शेख यांचाही सहभाग होता. बार्शी येथील उडान फाउंडेशन सुद्धा शासन दरबारी पत्रव्यवहार करीत होते. अशात चाँद शेख यांचे अल्पशः आजाराने शनिवारी निधन झाले. त्यांच्या दफनविधीसाठी जागा मिळावी, यासाठी सदरील संस्थांनी जिल्हाधिकारी कार्यालयासमोर मृतदेह ठेवून आंदोलन करण्याचा प्रशासनाला इशारा दिला.
त्यामुळे जिल्हाधिकारी कार्यालय प्रवेशद्वार, पुनम गेट चौक आणि काँग्रेस भवन परिसरात शहर पोलिसांनी चोख बंदोबस्त लावला. या तीन ठिकाणी बंदोबस्त लावल्याने नेमके आंदोलन कोठे होईल, याबद्दल संभ्रमावस्था होती. दरम्यान तुळजापूर रस्त्यावर असलेल्या ग्रामीण पोलिसांच्या पथकाने सोलापूर शहरापासून सुमारे १० किलोमीटर अंतरावर एक शववाहिका अडवली. त्यातच चाँद शेख यांचे शव ठेवण्यात आले होते.
शववाहिकेला तुळजापूर रस्त्यावरील दर्शन हॉटेल जवळ थांबविण्यात आल्याचे समजताच सदरील संघटनांच्या कार्यकर्त्यांनी घटनास्थळाकडे धाव घेतली. त्यानंतर ग्रामस्थ आणि कार्यकर्त्यांनी जिथे शववाहिका रोखून धरण्यात आली होती, तेथेच आंदोलन सुरू केले. जोपर्यंत दफनभूमीसाठी जागा उपलब्धतेचे लेखी पत्र प्रशासनाकडून उपलब्ध होत नाही, तोपर्यंत आंदोलन थांबणार नाही, अथवा मृतदेहावर अंत्यविधी करणार नाही, अशी आक्रमक भूमिका आंदोलनकर्त्यांनी घेतली.
सरपंच व तहसीलदार यांच्या समोपचाराने निवळले आंदोलन
शेवटी तांदुळवाडी गावचे सरपंच विकास हरिश्चंद्र गरड आणि बार्शी तालुक्याचे तहसीलदार ऋषिकेश शेळके यांनी त्या आंदोलनस्थळी भेट दिली. दफनभूमीसाठी जागा उपलब्ध करून देण्याचे लेखी पत्र दिल्यानंतर सामोपचाराने हे आंदोलन संपविण्यात आले. त्यानंतर मृतदेह दफनविधीसाठी तांदुळवाडी गावाकडे परत नेण्यात आला.
