पंढरपूर - श्री विठ्ठल रुक्मिणी मातेच्या मुख दर्शनासाठी स्थानिक नागरिकांना ऑनलाइन बुकींग पासची अट रद्द करण्यात आली आहे. आता पूर्वीप्रमाणे सकाळी सहा ते सात या वेळात पंढरपुरातील स्थानिक नागरिकांना ऑनलाइन बुकिंग न करता प्रवेश दिला जाणार आहे, अशी माहिती श्री विठ्ठल-रुक्मिणी मंदिर समितीचे सहअध्यक्ष गहिनीनाथ महाराज औसेकर आणि कार्यकारी अधिकारी विठ्ठल जोशी यांनी दिली.
पंढरपूर येथील श्री विठ्ठल रुक्मिणी मंदिरात ऑनलाइन दर्शनाचे बुकींग करून आलेल्या भाविकांना मुखदर्शनासाठी सोडण्यात येत आहे. सुरुवातीस एक हजार भाविकांना दिवसभरात मुखदर्शनासाठी सोडले जात होते. पंढरपूर शहरातील स्थानिक नागरिकांना दिपावलीच्या काळात एक दिवस विठ्ठलाचे मुखदर्शन उपलब्ध करून दिले होते. तसेच ऑनलाइन बुकींग पास घेण्याची अट ही एक दिवसासाठी रद्द करण्यात आली होती.
हेही वाचा - सोन्याची झळाळी पडतेय फिकी; जागतिक बाजारातील चढ-उताराचा परिणाम
ओळखपत्र आवश्यक -
पंढरपुरमधील स्थानिक नागरिकांसाछी 5 डिसेंबरपासून ही पद्धत पुन्हा सुरू करण्यात येणार आहे. स्थानिक नागरिकांना दररोज सकाळी सहा ते सात या वेळात मंदिरात मुखदर्शनासाठी प्रवेश दिला जाणार आहे. संबंधित नागरिकांना स्थानिक नागरिक असल्याविषयी आधार कार्ड अथवा मतदान कार्ड दाखवावे लागणार आहे.
पंढरपुरचा रहिवाशी असल्याबाबतचा पुरावा आवश्यक असणार आहे. तसेच त्यांना कासार घाट येथील दर्शन रांगेतून प्रवेश देण्यात येणार आहे. त्याचबरोबर कोरोना विषाणूच्या पार्श्वभूमीवर 65 वर्षांपुढील व्यक्ती, 10 वर्षांखालील मुले, गर्भवती महिला तसेच आजारी व्यक्ती यांनी दर्शनासाठी येण्याचे टाळावे, असे आवाहन मंदिर समितीचे कार्यकारी अधिकारी विठ्ठल जोशी यांनी केले आहे.
