सोलापूर - राष्ट्रवादी काँग्रेसचे नऊ आमदार आमच्या संपर्कात असल्याचा गौप्यस्फोट भाजपचे खासदार रणजितसिंह नाईक निंबाळकर यांनी केला आहे. माढा लोकसभा मतदारसंघात शेतीची पाहणी करण्यासाठी आल्यानंतर पत्रकारांशी बोलताना त्यांनी असे म्हटले.
हेही वाचा - VIDEO : महाराष्ट्रातील राजकीय परिस्थितीवर अमित शाहांनी सोडले मौन; पाहा काय म्हणाले...
विधानसभा निवडणुकीच्या तोंडावर शरद पवार हे राज्यभरात सहानुभूती निर्माण करण्यात यशस्वी ठरले. राष्ट्रवादीला यंदा मोठे यश मिळाले, त्यामध्ये साताऱ्यातील पावसामधील पवारांची सभा ही फायदेशीर ठरल्याचे भाजपचे खासदार रणजितसिंह नाईक निंबाळकर म्हणाले. राष्ट्रवादी काँग्रेसचे राज्यभरातील 9 आमदार माझ्या संपर्कात आहेत, असेही त्यांनी यावेळी सांगितले. भाजप शिवसेना भावंडे आहेत ती एकत्रच येतील, असा विश्वास निंबाळकर यांनी यावेळी व्यक्त केला.
परतीच्या पावसाने शेतकऱ्याचे नुकसान झालेल्या माढा करमाळा भागातील शेतात जाऊन त्यांनी पाहणी केली. माढ्यातील शासकीय विश्रामगृहात आले असता त्यांनी पत्रकारांशी संवाद साधला. यावेळी भाजपचे प्रांतिक सदस्य राजकुमार पाटील, संजय कोकाटे, राजेंद्र चवरे, गणेश चिवटे, तानाजी जाधव, प्रातांधिकारी ज्योती कदम, तहसीलदार राजेश चव्हाण आदीसह शासकीय अधिकारी पदाधिकारी उपस्थित होते.
हेही वाचा - उद्धव ठाकरे - अहमद पटेल यांची भेट झालेली नाही, संजय राऊत यांचे स्पष्टीकरण
