सोलापूर - लोकमंगल सार्वजनिक वाचनालयातर्फे देण्यात येणाऱ्या साहित्य पुरस्कारांची घोषणा करण्यात आली आहे. द. तु. पाटील यांना 'चैत' कादंबरीसाठी, शर्मिला फडके यांना 'फोर सिझन्स' कादंबरीसाठी तर विश्राम गुप्ते यांना 'लेखकाची गोष्ट' या ललित लेखनासाठी हा पुरस्कार जाहिर करण्यात आला आहे. याशिवाय, मराठी भाषा संशोधन मंडळाचे संचालक डॉ. प्रदीप कर्णिक यांनादेखील हा पुरस्कार देण्यात येणार आहे. त्यांनी मराठी संशोधन पत्रिकेचे संपादन केले आहे.
गेल्या चार वर्षांपासून लोकमंगल वाचनालयाकडून राज्यस्तरीय लोकमंगल साहित्य पुरस्कार दिले जात आहेत. पुरस्काराचे हे पाचवे वर्ष आहे. यंदाचा पुरस्कार सोहळा १४ डिसेंबरला सायंकाळी ६ वाजता निर्मलकुमार फडकुले सभागृहात संपन्न होणार आहे.
हेही वाचा - ज्येष्ठ अभिनेते नसिरुद्दीन शहा यांना यंदाचा 'तन्वीर सन्मान पुरस्कार' जाहीर
यापूर्वी, लोकमंगल पुरस्कार मिळाललेल्या अनेक पुस्तकांना नंतर शासकीय आणि इतर पुरस्कार मिळाले आहेत. नंदा खरे, सुहास बहुळकर, सुधीर रसाळ, आनंद कुंभार, प्रवीण बांदेकर, श्रीकांत देशमुख, सई परांजपे, गोपाळराव देशमुख, मकरंद साठे, गणेश मतकरी, मंगेश काळे, राजीव नाईक, ऋषिकेश गुप्ते, प्रफुल्ल शिलेदार हे यापूर्वी या पुरस्काराचे मानकरी ठरले आहेत. पुरस्कार सोहळ्याला मोठ्या संख्येने उपस्थित राहून या प्रतिभासंपन्न साहित्यिकांच्या विचारांचा आनंद घ्यावा, असे आवाहन लोकमंगल समूहाचे संस्थापक आणि माजी सहकार मंत्री सुभाष देशमुख यांनी मराठी साहित्य रसिकांना केले आहे.
