सोलापूर - सोलापूरचे पालकमंत्री विजयकुमार देशमुख यांनी करमाळ्यातील बँक दुर्घटनेत जखमी झालेल्या लोकांची कुटीर रुग्णालयात जाऊन भेट घेतली. तसेच जखमींची विचारपूस केली.
करमाळ्यात बँक ऑफ महाराष्ट्रचा स्लॅब कोसळला यामध्ये एक जणाचा मृत्यू झाला असून ७ जण जखमी झाले आहेत. तर ९ जण किरकोळ जखमी झाले आहेत. प्रशांत बागल (३७, रा.भोसरे ता.माढा) असे मृत व्यक्तीचे नाव असून ते प्रतापसिंह मोहिते पाटील महाविद्यालयाचे कर्मचारी आहेत.
या घटनेनंतर सुरज पवार, अनिल वारे, चंद्रकांत पवार, लैला पवार, सुनील काळे, मंगल गरड नंदाबाई पवार, सुभद्रा लकडे, राजेंद्र भोसले आणि लोचना गुंजाळ या जखमींना सोलापूरला पाठविण्यात आले. तर नारायण भोसले, मंगल गरड, नवनाथ देमुंडे, अमितकुमार साहेब, महादेव मोरे, आबा जाधव यांच्यावर करमाळ्यातील उपजिल्हा रुग्णालयात उपचार सुरू करण्यात आले.
करमाळा शहरात महिंद्र नगर भागात राजेश दोशी यांची ३ मजली इमारत आहे. या इमारतीच्या खालच्या बाजूस बँक ऑफ महाराष्ट्र आहे. बुधवारी सकाळी ११ वाजण्याच्या सुमारास अचानकपणे पहिल्या मजल्यावरील लोखंडी अँगल व फरशीचा स्लॅब कोसळला. या दुर्घटनेत बँक कर्मचाऱ्यांसह काही खातेधारक अडकले. घटनेनंतर प्रशासनाकडून बचावकार्य सुरू करण्यात आले. यावेळी नागरिकांनी मोठी गर्दी केली होती.
