सोलापूर - बनावट कागदपत्रे सादर करून तब्बल 32 वर्षे शिक्षकी नोकरी केल्याचा धक्कादायक प्रकार समोर आला आहे. आमसिद्ध भिकप्पा बिराजदार असे शिक्षकाचे नाव आहे. या शिक्षका विरोधात वळसंग पोलीस ठाण्यात गुन्हा दाखल करण्यात आला आहे. तो अहेरवाडी येथील जिल्हा परिषद शाळेत सहायक शिक्षक या पदावर कार्यरत होता. सद्या त्याच्यावर निलंबनाची कारवाई सुरू आहे.
आरोपी आमसिद्ध बिराजदार याने 32 वर्षांपूर्वी नोकरीत रुजू होताना मुंबई येथील एस. के. सोमय्या डीएड महाविद्यालयातुन डीएड पूर्ण केले, असे प्रमाणपत्र आणि गुणपत्रक सादर केले होते. या प्रमाणपत्रावर प्राचार्य पाटील यांनी सही केल्याचे नमूद होते. मात्र, चौकशी अंती 1982 ते 1989 या कालावधीत त्या महाविद्यालयात कोणतीही पाटील नावाची व्यक्ती प्राचार्य नव्हती. या कालावधीमध्ये त्या महाविद्यालयात कांताबेन आशार या प्राचार्य असल्याची माहिती समोर आली आहे. तसेच आरोपी शिक्षक बिराजदार याने मुबंई येथील ज्या महाविद्यालयाचा दाखला दिला आहे ते महिला महाविद्यालय असल्याची माहिती समोर आली आहे.
हेही वाचा - प्राथमिक आरोग्य केंद्रातील १०८ अ‌ॅम्ब्युलन्सचा डॉक्टर कोरोनाबाधित; 13 जण क्वारंटाईन
आरोपी आमसिद्ध बिराजदार याने 1988 साली खोटे आणि बनावट प्रमाणात सादर केले होते. यानंतर त्याने सोलापूर येथील जिल्हा परिषद शाळेमध्ये सहायक शिक्षक पदावर नोकरी प्राप्त केली. याप्रकारे त्याने तब्बल 32 वर्ष शासनाची आर्थिक फसवणूक केली. याप्रकरणी आरोपी बिराजदार याच्याविरोधात तक्रारी अर्ज मिळाले होते. त्यानुसार महाराष्ट्र राज्य परीक्षा परिषद पुणे यांनी ही चौकशी केली. त्यानुसार दक्षिण सोलापूर तालुक्याचे प्रभारी गट शिक्षणाधिकारी मल्हारी बनसोडे यांनी वळसंग पोलीस ठाण्यात तक्रार दाखल केली.
सद्या त्याच्यावर निलंबनाची कारवाई सुरू आहे. तर अधिक तपास वळसंग पोलीस ठाण्याचे पोलीस करत आहेत. दरम्यान, 32 वर्षांनंतर एका शिक्षकाचे खोटे कारस्थान समोर आल्याने शिक्षण खात्यात एकच खळबळ उडाली आहे.
