सोलापूर - प्रहार संघटनेचे पश्चिम महाराष्ट्र अध्यक्ष अतुल खुपसे यांनी माढ्यातील राष्ट्रवादीचे उमेदवार संजय शिंदे यांनी हल्ला केल्याचा आरोप केला होता. पण, हा आरोप खोटा असून खुपसे यांचा दुसऱयाच कुटुंबासोबत शेतीचा वाद होता. या वादातूनच हाणामारीचा प्रकार घडल्याचे पोलिसांनी सांगितले आहे. त्यामुळे झालेल्या मारहाणीचा खुपसे राजकीय फायदा घेण्याचा प्रयत्न करत असल्याचे बोलले जात आहे.
लोकसभा निवडणुकीत अतुल खुपसे यांनी भाजपचा प्रचार केला. त्यामुळे राजकीय वैरापोटी शिंदे यांनी हल्ला केला असा आरोप खुपसेंनी केला. खुपसे यांच्या घराला आग लागल्याचा प्रकार काही दिवसांपूर्व घडला होता. पण, त्यांना झालेली मारहाण जमिनीच्या वादातून झाल्याचे सांगितले जात आहे. अतुल खुपसे यांनी त्यांच्या गावातील डांगे कुटुंबाची जमीन कराराने कसण्यासाठी घेतली होती. पण, खुपसे यांनी त्या जमिनीवर कब्जा केला. ही बाब समजल्यानंतर डांगे कुटुंबाने खुपसेंविरोधात पोलिसात तक्रार केली. दरम्यान खुपसेंच्या घराला आग लागण्याचे कारण स्पष्ट झाले नाही.
यात्रेनिमीत्त गावात आलेल्या डांगे कुटुंबाने स्वतःच्या शेतात जाऊन खुपसे कुटुंबाचे तेथील सामान बाहेर काढण्याचा प्रयत्न केला. वाद वाढत गेल्यामुळे दोन्हा कुटुंबात हाणामारी झाली. हा प्रकार मोबाईल कॅमेऱ्यात कैद झाला आहे. परस्परांच्या विरोधात पोलीस ठाण्यात तक्रारी दाखल करण्यात आली आहे. या प्रकरणात अतुल खुपसे, शोभा गायकवाड,शरद सपाटे,ज्ञानेश्वर घोरपडे,शाहीद मुलानी,रविकिरण गायकवाड, गणेश चव्हाण यांच्या विरोधात गुन्हा दाखल करण्यात आलेला आहे.
