पंढरपूर (सोलापूर) - महाविकास आघाडीचे सरकार पाडण्यासाठी भाजपकडे तीस आमदारांची कमतरता आहे. भारतीय जनता पक्षांकडून त्यांचे 105 आमदार दुसरीकडे जाऊ नये म्हणून महाविकास आघाडी सरकार पाडण्याची भाषा केली जात आहे. त्यांच्या आमदारांना गाजर दाखवण्याचे काम भाजप नेते करत असलेल्याची टीका उपमुख्यमंत्री अजित दादा पवार यांनी केली.
पंढरपूर-मंगळवेढा विधानसभेच्या निवडणुकीचे महाविकास आघाडीचे उमेदवार भगीरथ भालके यांच्या प्रचारार्थ पंढरपुरातील शिवाजी चौकामध्ये राष्ट्रवादी काँग्रेसच्या वतीने जंगी सभा घेण्यात आली. यावेळी राज्याचे उपमुख्यमंत्री अजित पवार, पाणीपुरवठा मंत्री गुलाबराव पाटील, राष्ट्रवादीचे प्रदेशाध्यक्ष जयंत पाटील, पालकमंत्री दत्तात्रय भरणे यांसह अनेक दिग्गज नेते उपस्थित होते.
उपमुख्यमंत्री अजित पवार यांनी चंपा म्हणत उडवली चंद्रकांत पाटील यांची खिल्ली
उपमुख्यमंत्री अजित पवार यांनी भाजपचे प्रदेशाध्यक्ष चंद्रकांत पाटील यांना चंपा म्हणत त्यांच्या नावाची पुन्हा एकदा खिल्ली उडवली. भाजपच्या कोणत्याच नेत्यांनी सहकारी संस्था काढल्या नाहीत किंवा कारखानेही उभारले नाही. भाजप नेत्यांना यामध्ये कोणत्याही प्रकारचा अनुभव नाही. पुढे विरोधी पक्ष नेते फडणवीस यांच्यावर निशाणा साधत पवार म्हणाले, भाजपने कधी टरबूज-खरबूज संस्थाही काढली नाही, अशी टीका उपमुख्यमंत्री पवार यांनी केले.
तुम्ही फक्त नकला करा, महाविकास आघाडी विकास करेल
भारतीय जनता पक्षाचे उमेदवार समाधान आवताडे यांच्या प्रचारार्थ मंगळवेढा येथे विरोधी पक्षनेते देवेंद्र फडणवीस यांनी उपमुख्यमंत्री अजित पवार यांची नक्कल करत त्यांची त्यांच्यावर टीका केली होती. त्याला उत्तर देताना अजित पवार म्हणाले, तुम्ही फक्त नकला करा महाविकास आघाडी सरकार विकास करेल. भाजपला नकलाकार म्हणत अजित पवार यांनी सावध राहण्याचा सल्ला जनतेला दिला.
महाविकास आघडी सरकार पस्तीस गावाच्या पाण्याचा प्रश्न मिटणार
महाविकास आघाडी सरकारमधील अर्थ मंत्रालय आपल्याकडे आहे. मंगळवेढा तालुक्यातील पस्तीस गावाचा प्रश्न महाविकास आघाडी सरकार सोडवू शकते. पाच वर्षे भाजपचे सरकार होते. त्याकाळात भाजप सरकारकडून मंगळवेढा तालुक्यातील 35 गावांना एक रुपयांचा निधी का दिला नाही, असा सवाल उपमुख्यमंत्री अजित पवार यांनी फडणवीस यांना विचारला.
हेही वाचा - डॉ. बाबासाहेब आंबेडकरांच्या स्पर्शाने पावन झालेली ऐतिहासिक विहीर
