सोलापूर - जिल्ह्यातील माळशिरस तालुक्यात कार (क्रमांक MH 13 CG 5599) आणि सिमेंटने भरलेल्या टँकरचा भीषण अपघात झाल्याची घटना घडली. या अपघातात कारमधील ५ जण जागीच ठार झाले असून, एक लहान मुलगी आणि २ महिला गंभीर जखमी झाल्या आहेत. जखमींवर उपचार सुरू आहेत.
माळशिरस तालुक्यातील वेळापूर ते खुडूसदरम्यान हा अपघात झाला. या अपघातात ५ जणांचा जागीच मृत्यू झाला. स्थानिक लोकांनी घटनास्थळी धाव घेऊन ३ व्यक्तींना बाहेर काढले. तसेच जखमींना उपचारासाठी रुग्णालयात दाखल केले आहे. दरम्यान वेळापूर पोलीस स्टेशनच्या हद्दीमध्ये हा अपघात झाल्याने वेळापूर पोलीस स्टेशनचे अधिकारी व कर्मचारी घटनास्थळी दाखल झाले आहेत.
या अपघातामध्ये मृत्यू झालेले प्रवासी हे वैराग (ता. बार्शी) येथील फलफले परिवारातील आहेत. सदरच्या ईरटीका कारमधील व्यक्तींचे नातेवाईक मंत्रालयामध्ये उच्चपदस्थ असल्याची माहिती मिळाली आहे. पुढील तपास वेळापूर पोलीस स्टेशन करत आहे.
