सिंधुदुर्ग - नारायण राणे आणि नितेश राणे यांनी मुख्यमंत्री उद्धव ठाकरे यांना गिफ्ट देण्याची कुवत आज तरी राहिलेली नाही. त्यांनी कितीही गिफ्ट देऊ केली तरी शिवसेनेला त्याची गरज नाही. शिवसेना पक्षप्रमुखांनी आपल्या मनाचा मोठेपणा किती आहे, तो दाखवून दिला आहे. तुम्ही शिवसेनेशी बेईमानी केली, तरीही तुमच्या मेडीकल काॅलेजचा प्रस्ताव शिवसेना पक्षप्रमुख मुख्यमंत्री उद्धव ठाकरे यांनीच मंजूर केला, दुसऱ्या कोणी केला नाही. त्यामुळे नितेश राणेंकडून गिफ्ट स्वीकारण्याची वेळ शिवसेनेवर आजतरी आलेली नाही. मात्र नितेश राणे यांच्यावर ती वेळ लवकरच येणार आहे, असे प्रत्युत्तर खासदार विनायक राऊत यांनी दिले आहे.
भाजपच्या सात नगरसेवकांनी शिवसेनेत प्रवेश केला आहे. त्यावर प्रतिक्रिया देताना नितेश राणे यांनी शिवसेना' हे आमचे जुने प्रेम आहे. 'व्हॅलेंटाईन डे'च्या निमित्ताने हे सात नगरसेवक मी मुख्यमंत्री उद्धव ठाकरे यांच्याकडे पाठवले आहेत. आमच्या मेडिकल कॉलेजच्या फाईलवर मुख्यमंत्री उद्धव ठाकरे यांनी सही केली. याबाबत आम्ही त्यांना पुष्पगुच्छ जरी पाठवला तरी, ते आमच्याकडून घेणार नाहीत. मात्र, त्यांना एक भेट म्हणून हे नगरसेवक त्यांच्याकडे पाठवत आहे. त्यांनी त्यांचा स्वीकार करावा. अशा उपरोधित शब्दांत वाभावें-वैभववाडी नगरपंचायतीच्या नगरसेवकांनी भाजपच्या दिलेल्या राजीनाम्यावर आमदार नितेश राणे यांनी प्रतिक्रिया दिली होती. त्यावर खासदार राऊत यांनी राणे यांची गिफ्ट देण्याची कूवत नसल्याची टीका केली. यावेळी खासदार राऊत यांनी निलेश राणे यांच्या धमकीवजा इशाऱ्याचाही समाचार घेतला.
त्याच दिवशी आम्ही देणार होतो हा धक्का-
राणेंची थोडीतरी लाज राखावी या मोठेपणाने आम्ही भाजप नगरसेवकांचा प्रवेश दोन दिवस पुढे ढकलला. नाहीतर केंद्रीय गृहमंत्री अमित शहा ज्या दिवशी सिंधुदुर्गात आले, त्याच दिवशी नगरसेवकांच्या पक्षप्रवेशाचा हा धक्का आम्ही देऊ शकत होतो. वैभववाडीच्या ज्या नगरसवकांनी प्रवेश केला त्यांनी नितेश राणेंच्या हटवादी पणाला कंटाळूनच केला आहे. अजूनही जिल्ह्यातील अनेक पदाधिकारी शिवसेनेत येतील आणि त्याला कारण यांची दादागिरी आणि हटवादीपणाच कारणीभूत असल्याचेही राऊत म्हणाले.
ती भाषा निलेश राणेंनाच शोभते-
निलेश राणें यांनी विनायक राऊत यांच्या टीकेला प्रत्युत्तर देताना एकेरी भाषेचा वापर करत मारहाण करण्याची भाषा केली होती. त्यावर बोलताना खासदार राऊत म्हणाले, की निलेश राणे यांच्या या बकवासगिरीला कोकणातील जनतेने एकदा नाही तर दोनदा धडा शिकवला आहे. मारामारीची, अरेरावीची, शिवीगाळीची भाषा निलेश राणेंनाच शोभते इतर कोणाला शोभत नाही. कोकणवासीय सुज्ञ आहेत, तसेच राणेंना पुन्हा एकदा धडा शिकवण्याची वेळ आलेली आहे.
देशातील शेतकरी तुम्हाला तुमची जागा दाखवेल
देशातील लाखो शेतकरी तीथे आक्रोश आंदोलन करत असताना दुर्दैवाने देशाचे पंतप्रधान नरेंद्र मोदी यांनी त्यांची निर्भत्सना केली आहे. आंदोलनजीवी म्हणून जर तुम्ही त्यांची थट्टा करत असाल तर हाच देशातील शेतकरी तुम्हाला तुमची जागा दाखवल्या शिवाय राहणार नाही
