दिल्ली, गोवा, राजस्थान, केरळमधून सिंधुदुर्गात येणाऱ्या व्यक्तींना कोरोना चाचणी बंधनकारक

देशात गेल्या वर्षभरापासून कोरोनाने धुमाकूळ घातला आहे. मध्यंतरी कोरोना रुग्णांच्या संख्येत कमालीची घट झाली होती. त्यामुळे आरोग्य यंत्रणांना काहीसा दिलासा मिळाला होता. मात्र, गेल्या आठ दिवसांपासून कोरोना रुग्णांच्या संख्येत वाढ होताना दिसत आहे. परिणामी प्रत्येक जिल्ह्याच्या जिल्हाधिकाऱ्यांनी आपली यंत्रणा सतर्क केली आहे.

सिंधुदुर्ग - जिल्ह्यात दिल्ली, गोवा, राजस्थान, केरळ या ठिकाणांहून येणाऱ्या व्यक्तींना कोरोना चाचणी करणे बंधनकारक आहे, असे आदेश जिल्हाधिकारी के. मंजुलक्ष्मी यांनी दिले. जिल्ह्याच्या प्रवेशद्वारावर महसूल, पोलीस व आरोग्य विभागाचे पथक तैनात करण्यात येणार आहे. धार्मिक कार्यक्रमांसह देवस्थान आणि पर्यटनस्थळांवर जिल्हा प्रशासनाची करडी नजर राहणार आहे, अशी माहिती जिल्हाधिकाऱ्यांनी दिली.

जिल्हाधिकारी कार्यालयात एक पत्रकार परिषद आयोजित करण्यात आली होती. त्यावेळ मंजुलक्ष्मी यांनी ही माहिती दिली. या पत्रकार परिषदेला पोलीस अधीक्षक राजेंद्र दाभाडे, जिल्हा परिषद मुख्य कार्यकारी अधिकारी डॉ. हेमंत वसेकर, जिल्हा शल्य चिकित्सक डॉ. श्रीमंत चव्हाण, अतिरिक्त जिल्हा शल्यचिकित्सक डॉ. श्रीपाद पाटील, जिल्हा लसीकरण, प्रजनन व बाल अधिकारी डॉ. संदेश कांबळे, जिल्हा माहिती अधिकारी हेमंत चव्हाण उपस्थित होते.

पुन्हा लॉकडाऊन करण्याची वेळ आणू नका -

कोरोनाचे रुग्ण वाढत असल्यामुळे गर्दीवर नियंत्रण ठेवण्यासाठी मंगल कार्यालये, धार्मिक कार्यक्रमांसह देवस्थान आणि पर्यटनस्थळांवर जिल्हा प्रशासनाची करडी नजर राहणार आहे. 50 पेक्षा कमी व्यक्तींचा सहभाग, मास्क, सॅनिटायझर आदी सुविधांचा वापर होतो की नाही, याची कसून तपासणी केली जाणार आहे, अशी माहिती जिल्हाधिकारी के. मंजुलक्ष्मी यांनी पत्रकार परिषदेत दिली. सर्वांनी नियम पाळावेत. जिल्ह्यात पुन्हा लॉकडाऊन करण्याची वेळ आणू नका, असे आवाहनही त्यांनी केले.

जिल्ह्याच्या प्रवेशद्वारावर महसूल, पोलीस व आरोग्य विभागाचे पथक -

दिल्ली, गोवा, राजस्थान, केरळ या राज्यातून येणाऱ्या व्यक्तींना कोरोना टेस्ट करणे बंधनकारक करण्यात आले आहे. या राज्यातून गावात आलेल्या व्यक्तींची माहिती देण्याचे आवाहन सर्व ग्राम समित्यांना केले आहे. कोरोनाचा प्रादुर्भाव वाढू लागल्यास जिल्ह्याच्या पत्रादेवी आणि खारेपाटण येथील प्रवेशद्वारावर महसूल, पोलीस व आरोग्य विभागाचे पथक नेमून तपासणी केली जाणार असल्याचेही जिल्हाधिकाऱ्यांनी स्पष्ट केले.

जिल्ह्याबाहेरून येणाऱ्या व्यक्तींमुळे कोरोना संसर्ग वाढू शकतो -

अमरावती जिल्ह्यासह पुणे, मुंबई या ठिकाणी कोरोना रुग्ण वाढू लागले आहेत. त्या ठिकाणी लॉकडाऊन सुरू झाले आहे. सिंधुदुर्गात कोरोना रुग्ण वाढत नसले तरी जिल्ह्याबाहेरून येणाऱ्या व्यक्तींमुळे कोरोना संसर्ग वाढू शकतो. त्यामुळे आतापासून सतर्क राहिले पाहिजे. मुख्यमंत्री उद्धव ठाकरे यांनी जाहीर केल्याप्रमाणे आता ‘माझी जबाबदारी’ ही मोहीम राबविली जाणार आहे. ही मोहीम लक्षात घेऊन प्रत्येकाने स्वतःची जबाबदारी ओळखून मास्कचा वापर करणे, गर्दीत जाणे टाळावे, असे जिल्हाधिकारी म्हणाल्या.

सिंधुदुर्ग जिल्ह्याने कोरोना नियंत्रणात ठेवला -

सर्व नागरिकांनी चांगली साथ दिल्यामुळे आपल्या जिल्ह्याने कोरोना नियंत्रणात ठेवला. राज्यात सर्वात चांगले काम सिंधुदुर्गचे आहे. येथील मृत्यूदर हा 2.7 असून राज्याच्या तुलनेत हा कमी आहे. परंतु यापुढे कोरोनाने मृत्यू होऊ नये, यासाठी सर्वतोपरी खबरदारी घेण्याच्या सूचना जिल्हा शल्य चिकित्सकांना दिल्या आहेत. तर कोरोनाचे रुग्ण वाढू नयेत, यासाठी सर्वांनी सहकार्य करावे आणि जिल्ह्यात पुन्हा लॉकडाऊनची वेळ आणू देऊ नका, असे आवाहनही जिल्हाधिकाऱ्यांनी केले.

धार्मिक स्थळे व अन्य कार्यक्रमाच्या ठिकाणी अचानक भेटी दिल्या जाणार -

गर्दी टाळण्यासाठी मंगल कार्यालये, धार्मिक, राजकीय कार्यक्रम, पर्यटन स्थळांवर निर्बंध घालण्यात आले आहेत. प्रत्येक तालुक्यात पोलीस अधिकारी, गटविकास अधिकारी आणि महसूल अधिकाऱ्यांचे पथक नेमले आहे. या पथकामार्फत मंगल कार्यालये, धार्मिक स्थळे व अन्य कार्यक्रमाच्या ठिकाणी अचानक भेटी दिल्या जाणार आहेत. परवानगीशिवाय किंवा परवानगी दिलेल्या 50 पेक्षा जास्त व्यक्ती दिसून आल्यास कडक कारवाई केली जाणार आहे. मास्क न वापरणाऱ्यांवरही कडक कारवाई केली जाणार आहे. त्यामुळे कुणीही विनामास्क फिरू नये, असे आवाहन जिल्हाधिकाऱ्यांनी केले.

जिल्ह्यात टेस्टिंगचे प्रमाण वाढवणार -

सिंधुदुर्ग जिल्ह्यात कोरोना रुग्णसंख्या वाढली नसली तरी जिल्ह्याबाहेरून येणाऱ्या व्यक्तींपासून धोका आहे. त्यामुळे आता कोरोना तपासणीचे प्रमाण वाढवले जाणार आहे. प्राथमिक आरोग्य स्तरावरही स्वॅब कलेक्शन केले जाणार आहे. अँटिजेनपेक्षा आरटीपीसीआर टेस्ट वाढवण्यात येणार आहेत. सध्या जिल्हा रुग्णालयातील कोविड सेंटरमध्ये रुग्ण उपचार घेत आहेत. परंतु रुग्ण वाढल्यास सावंतवाडी, शिरोडा, कणकवली उपजिल्हा रुग्णालयातही कोविडच्या रुग्णांसाठी बेडची व्यवस्था केली जाणार आहे, असे जिल्हाधिकाऱ्यांनी स्पष्ट केले.

संपर्कातील व्यक्तींचा शोध घेणार -

कोरोनाबाधित रुग्ण सध्या त्यांच्या संपर्कात आलेल्या व्यक्तींची नावे देत नाहीत. हे योग्य नाही. त्यामुळे आता कोरोनाबधित व्यक्तीच्या संपर्कातील व्यक्तींचा शोध घेण्याच्या सूचना दिल्या आहेत. जिल्ह्यात सध्या 159 सक्रिय रुग्ण आहेत. त्यापैकी 25 रुग्णच कोविड सेंटर मध्ये उपचार घेत आहेत. बाकीचे रुग्ण होम आयसोलेशनमध्ये आहेत. त्यांनी निष्काळजीपणे दुसऱ्याच्या संपर्कात येऊ नये, अशा सूचना जिल्हाधिकाऱ्यांनी केल्या आहेत.

शिक्षकांसोबत विद्यार्थ्यांचीही होणार तपासणी -

वरिष्ठ महाविद्यालये सुरू होणार असल्याने सर्व प्राध्यापकांची कोरोना तपासणी केली जाणार आहे. तसेच शाळांमधील शिक्षक, विद्यार्थी यांचीही तपासणी केली जाणार आहे, अशी माहिती जिल्हा परिषदेचे मुख्य कार्यकारी अधिकारी हेमंत डॉ. वसेकर यांनी दिली. तसेच प्रत्येक कुटुंब प्रमुखाने आपली जबाबदारी ओळखून कोरोनाचा प्रादुर्भाव होऊ नये, यासाठी सहकार्य करण्याचे आवाहन त्यांनी केले.

मास्क न वापरणाऱ्यांवर पोलिसांकडून होणार दंडात्मक कारवाई -

कोरोना रोखण्यासाठी प्रत्येकाने मास्क वापरण्याची गरज आहे. अनेकवेळा आवाहन करूनही नागरिक मास्क वापरत नसतील तर पोलीस दंडात्मक कारवाई करतील. ही कारवाई टाळण्यासाठी आणि कोरोना रोखण्यासाठी मास्क वापरून सहकार्य करावे. मास्क न वापरल्याने दंडात्मक कारवाई करताना नागरिकांना मास्कही दिले जाणार आहेत. तसेच ज्यांची आर्थिक परिस्थिती नाही, त्यांनाही पोलीस मास्क देतील, अशी माहिती पोलीस अधीक्षक राजेंद्र दाभाडे यांनी दिली.