सिंधुदुर्ग - कोरोनाच्या काळात सध्या ऑनलाइन शाळा सुरू आहेत. मात्र, या शाळेत मुलांना काही शिक्षणाची मज्जा घेता येत नाही. शालेय मुलांच्या मनातील या भावभावना युवा चित्रकार अक्षय मेस्त्री याने त्याच्या चित्राद्वारे मांडल्या आहेत. आपल्या देवगड तालुक्यातील गवाने येथील निवासस्थानी त्यांनी शाळेत विद्यार्थ्यांसोबत रमलेला, त्यांच्यासोबत गप्पा मारणारा बाप्पा साकारला आहे. विद्यार्थी, पालक आणि शिक्षकांच्या मनातील भावना अचूकपणे सांगणारा बाप्पा चक्क आपल्या विद्यार्थ्यांसोबत शाळेतच गेला आणि त्यानंतर बाप्पाला जे प्रश्न विद्यार्थी विचारताहेत, त्याचे सारे चित्रण अक्षय मेस्त्री याने देखाव्यातून मांडले आहेत.
अक्षय मेस्त्री सांगतो, गेल्यावर्षी आम्ही आमच्या बाप्पाला शालेय साहित्य देण्याचे आवाहन केले होते. त्यानुसार जमा झालेल्या रोख रकमेतून काही घरगुती साहित्य घेऊन ते अनाथाश्रम आणि मिळालेले शैक्षणिक साहित्य विविध शाळेतील मुलांना मोफत वाटप केले. यामागे निव्वळ सामाजिक हेतू आहे. यावर्षीही अजून एक कल्पना घेऊन आम्ही तुम्हाला एक आवाहन करणार आहोत. आपण आमच्या बाप्पाच्या दर्शनाला अवश्य या. कोरोनाच्या पार्श्वभूमीवर सर्वत्र हालाखीची परिस्थिती लक्षात घेता येताना कोणत्याही वस्तू अथवा साहित्य न आणता बाप्पासमोर असलेल्या डब्यात आपल्या इच्छेनुसार पैसे टाकू शकता. या देणगीतून आम्ही गरजू व्यक्ती, कुटुंब अथवा संस्था यांना मदत करणार आहोत, असेही त्याने यावेळी सांगितले.
चित्रकार अक्षय मेस्त्री हा हरहुन्नरी कलाकार आहे. आपल्या चित्रातून नेहमीच त्याने सामाजिक संदेश मांडण्याचा प्रयत्न केला आहे. अलिकडेच त्याने काढलेले भिंतीवरील 'ऑनलाइन शाळेपेक्षा आमची शाळाच बरी' हे चित्र विशेष चर्चेत आले होते. त्याने येथील माळरानावर आषाढी एकादशीला विठ्ठलाची महाकाय प्रतिकृती हिरव्या गवतात साकारून महाराष्ट्राचे लक्ष वेधून घेतले होते. आतापर्यंत एवढे मोठे चित्र गवतात साकारण्याचा प्रयत्न फारच कमी जणांनी केला आहे.
सातत्याने सामाजिक भान देणारी चित्रे साकारणाऱ्या अक्षय मेस्त्री याने कोरोनाच्या काळातही जनजागृती करणाऱ्या चित्रांची मालिका साकारली होती. यातून समाजात कोरोना महामारी रोखण्यासाठी सातत्याने विविध आघाड्यांवर प्रयत्न करणाऱ्या लोकांना समाजाने कशी वागणूक दिली पाहिजे, याचा संदेश त्याने दिला होता. आता त्याच्या या अनोख्या देखाव्याने मुलांच्या मनात काय चाललंय याचा वेढा घेतला जात असून, हा देखावा सर्वांच्या पसंतीस उतरला आहे.
हेही वाचा - ऑनलाईन शिक्षणाने आमचा अभ्यास होत नाही घरी, गड्या आपली शाळाच बरी...
