सातारा - महिला पोलीस कर्मचाऱ्यावर बलात्कार केल्याप्रकरणी पोलीस मुख्यालयातील संशयित पोलीस शिपाई अक्षय सतीश कांबळे (ता.सातारा) याच्या विरोधात बलात्काराचा गुन्हा दाखल करण्यात आला आहे. संबंधित महिला पोलिसानेच याबाबत तक्रार दिली असून शाहूपुरी पोलिसांनी त्याला अटक केली आहे. दरम्यान, संशयिताने पोलीस ठाण्यात आत्महत्या करण्याचा प्रयत्न केला.
हेही वाचा - पुण्याच्या विश्रांतवाडी परिसरात किरकोळ कारणावरून झालेल्या भांडणातून तरुणाचा खून
संशयित अक्षय कांबळे व तक्रारदार तरुणी यांची ओळख आहे. या ओळखीचा गैरफायदा घेऊन ‘माझे तुझ्यावर प्रेम आहे. मी तुझ्याशी लग्न करतो,’ असे सांगून आश्‍वासन दिले. लग्नाचे आमिष दाखवून संशयिताने जून 2019 ते नोव्हेबर 2019 या कालावधीत तिच्यावर इच्छेविरुध्द वेळोवेळी शारीरिक संबंध ठेवले.
संशयित कांबळे याने तरुणीकडून 50 हजार रुपये उसने घेतले. गेल्या काही दिवसांपासून तरुणीने लग्नाबाबत विचारणा केल्यानंतर तो त्याबाबत टाळाटाळ करू लागला. उसने घेतलेले पैसे मागितल्यानंतर ते पैसेही देण्यास त्याने टाळाटाळ केली. फसवणूक झाल्याचे लक्षात आल्यानंतर तिने शाहूपुरी पोलीस ठाण्यात कांबळे विरुध्द तक्रार दिली. त्यावरून पोलिसांनी बलात्कार व फसवणुकीचा गुन्हा दाखल केला. संशयिताला पोलिसांनी अटक केली असून मंगळवारी न्यायालयात हजर केले असता न्यायाधिशांनी त्याला पोलीस कोठडी दिली.
हेही वाचा - साताऱ्यात रंगली राज्यस्तरीय बास्केटबॉल स्पर्धा
बलात्काराचा गुन्हा दाखल होण्यापूर्वी संशयिताला एका पोलीस ठाण्यात चौकशीसाठी बोलावण्यात आले होते. यावेळी वादावादी सुरू असताना त्याने विष प्राशन करण्याचा प्रयत्न केला. त्यामुळे पोलीस ठाण्यात काही काळ गोंधळ उडाला.
