सातारा- पुणे-बंगळुरू राष्ट्रीय महामार्गावर मलकापूर (ता. कराड) येथे शुक्रवारी सकाळी 3 वाहनांचा विचित्र अपघात झाला. या अपघातात मुंबईच्या लालबागमधील एक महिलेचा मृत्यू झाला आहे. तर 5 जण जखमी झाले आहेत. जखमींवर खासगी रूग्णालयात उपचार सुरू आहेत.
शिल्पा मनोहर भगत (वय 62, रा. लालबाग मुंबई), असे अपघातात ठार झालेल्या महिलेचे नाव आहे. तर हर्षद मनोहर भगत (वय 40), मनोहर आत्माराम भगत (वय 60), मिताली अनंत सपकाळ (वय 32, तिघेही रा. लालबाग मुंबई), कार चालक सतीश साहेबराव भोईटे (वय 45), पीकअप चालक महेश आनंदा गायकवाड (वय 28, रा. ऐतवडे बुद्रुक, ता. वाळवा), असे 5 जण या अपघातात जखमी झाले आहेत.
मुंबईत लालबागमध्ये राहणारे भगत कुटुंबीय ब्रिझा कारमधून (एमएच-01-सीटी-3939) मुंबईहून कोल्हापूरकडे निघाले होते. शुक्रवारी सकाळी 7 वाजण्याच्या सुमारास पुणे-बंगळुरु राष्ट्रीय महामार्गावर मलकापूर येथे कार चालकाचा कारवरील ताबा सुटला आणि महामार्गावरील दुभाजक तोडून कारने पलीकडच्या रस्त्यावर जाऊन कोल्हापूर बाजूकडून सातारा बाजूकडे निघालेल्या पिकअपला (एमएच-45-टी-4096) धडक दिली. हा अपघात चुकविण्याच्या नादात एक टेम्पोही (एमएच-09-सीयू-1953) पलटी झाला. या 3 वाहनांच्या विचित्र अपघातात ब्रिझा कारमधील शिल्पा भगत यांचा मृत्यू झाला.
सकाळच्या सुमारास अपघात झाल्याने महामार्गावर वाहनांच्या लांबच लांब रांगा लागल्या होत्या. पोलिसांनी घटनास्थळी येऊन घटनास्थळाचा पंचनामा केला. क्रेनच्या सहाय्याने तिन्ही अपघातग्रस्त वाहने महामार्गावरून बाजूला करून वाहतूक सुरळीत करण्यात आली आहे.
