सातारा - जिल्ह्यातील मलकापुरात कोरोना प्रतिबंधात्मक नियमांचे उल्लंघन करणाऱ्यांना दंड ठोठावण्याचा निर्णय प्रशासनाने घेतला आहे. तोंडाला मास्क नसल्यास 500 रुपये, होम क्वारंटाईनचे उल्लंघन केल्यास, तसेच सार्वजनीक ठिकाणी थुंकणाऱ्यांना 1 हजार रुपये दंड केला जाणार असल्याची माहिती मलकापूरच्या नगराध्यक्षा नीलम येडगे यांनी दिली.
नागरिकांनी खरेदीसाठी बाहेर गेल्यानंतर सामाजिक अंतर ठेवणे आवश्यक आहे. सार्वजनिक ठिकाणी व घराबाहेर व जेथे लोकांचा वावर आहे, तेथे चेहर्‍यावर मास्क वापरणे बंधनकारक आहे. 65 वर्षावरील व्यक्ती, गर्भवती महिला व 10 वर्षाखालील मुलांना घराबाहेर पडण्यास मनाई आहे. मलकापूर शहरातील नागरिक व दुकानदारांनी अटी व नियमांचे पालन करावे. नियमांचे उल्लंघन करणाऱ्यांवर दंडात्मक कारवाई केली जाईल, असेही नगराध्यक्षा नीलम येडगे यांनी सांगितले.
