सातारा - लॉकडाऊनमध्ये मुंबईहून साताऱ्यात प्रवास करणाऱ्या 18 वर्षीय युवकावर सातारा पोलिसांनी गुन्हा दाखल करत त्याला संस्थात्मक विलगीकरणात ठेवले होते. आता हा युवक कोरोना पॉझिटिव्ह असल्याचे समोर आले आहे. यासोबतच कराड येथील कोरोनाबाधिताच्या संपर्कात व्यक्तीचा अहवालही कोरोना पॉझिटिव्ह आला आहे. जिल्हा शल्यचिकित्सक डॉ. आमोद गडीकर यांनी याबद्दलची माहिती दिली.
साताऱ्याजवळील कोडोली भागात राहणारा 18 वर्षीय युवक 27 एप्रिलला विनापरवाना मुंबईहून आला होता. साताऱ्यात प्रवेश करत असताना पोलिसांनी त्याला रोखले. विनापरवाना आल्याप्रकरणी पोलिसांनी त्याच्यावर गुन्हा दाखल केला. तिथूनच त्याला सातारा तालुक्यातील खावली येथे संस्थात्मक विलगीकरणामध्ये ठेवण्यात आले. आता तपासणीदरम्यान या तरुणाचा कोरोना अहवाल पॉझिटिव्ह आला आहे. आतापर्यंत जिल्ह्यातील कोरोनाबाधितांची संख्या 114 वर पोहोचली आहे. यापैकी 98 रुग्णांवर सध्या उपचार सुरु आहेत.
साताऱ्यातील बंधने शिथील -
सातारा शहर व त्रिशंखू भागासह खेड, विलासपूर, गोडोली, शाहूपुरी, म्हसवे, सैदापूर, वाढे, कोडोली, संभाजीनगर या 9 ग्रामपंचायतींचे क्षेत्र कंटेन्मेंट झोन घोषित करण्यात आले होते. नव्या निकषांनुसार सातारा शहराचा काही भाग व कोडोलीचा शिवाजीनगर परिसर याच क्षेत्रावर आता कंटेन्मेंट झोन राहिला आहे. सातारा शहराचा उर्वरित भाग कंटेन्मेंटमधून बाहेर आल्याने या क्षेत्रात अत्यावश्यक सेवेतील दुकाने सुरु होतील. तर, ग्रामीणमध्ये सकाळपासून संध्याकाळी ६ वाजेपर्यंत इतरही दुकाने उघडण्यास परवानगी राहणार आहे. तसे आदेश प्रांताधिकारी मिनाज मुल्ला यांनी दिले आहेत. या काळात दुचाकी व चारचाकी वाहनांना अटींवर परवानगी देण्यात आली आहे. आजपासून याची अंमलबजावणी सुरु झाली आहे.
