सातारा- जिल्ह्यात लक्षवेधी ठरणार्‍या पाटण विधानसभा मतदारसंघात राजकीय घमासान सुरू झाले आहे. शिवसेनेचे विद्यमान आमदार शंभूराज देसाई आणि राष्ट्रवादी काँग्रेसचे माजी मंत्री विक्रमसिंह पाटणकर यांचे पूत्र सत्यजितसिंह पाटणकर यांच्यात काट्याची टक्कर आहे. शंभूराजेंना या निवडणुकीत महायुतीमुळे बळ मिळाले आहे. असे असतानाच त्यांनी जिल्हा परिषदेचे माजी उपाध्यक्ष विक्रमबाबा पाटणकर यांच्या निवासस्थानी भेट दिल्याने पाटण तालुक्यात चर्चेचा धुरळा उडाला आहे. शंभूराजेंनी विक्रमबाबांना गळाला लावून मास्टरस्ट्रोक खेळल्याची चर्चा आहे.
विक्रमबाबा पाटणकर हे माजी मंत्री विक्रमसिंह पाटणकर यांच्या सरदार घराण्यातील आहेत. विक्रमबाबांचे वडील बाळासाहेब हे स्वातंत्र्य सैनिक आणि शेकापचे धडाडीचे नेते होते. पाटण तालुक्यात ते भडकबाबा म्हणून प्रसिध्द होते. त्यांनी लोकनेते बाळासाहेब देसाई यांच्या विरोधात दोन वेळा विधानसभाही लढविली होती. त्यातील एका निवडणुकीत ते पराभूत झाले आणि दुसर्‍या निवडणुकीत त्यांनी माघार घेतली होती. त्यामुळे लोकनेते बाळासाहेब देसाई हे बिनविरोध आमदार झाले होते.
हेही वाचा- साताऱ्यातील बंड काही प्रमाणात थंड; मैदानात फक्त दिग्गजांमध्ये लढत
राष्ट्रवादीच्या स्थापनेनंतर माजी मंत्री विक्रमसिंह पाटणकर हे राष्ट्रवादीत गेले. त्याबरोबर विक्रमबाबा पाटणकरांनीही राष्ट्रवादीत प्रवेश केला. १९९९ मध्ये ते जिल्हा परिषद सदस्य आणि नंतर जिल्हा परिषदेचे उपाध्यक्षही झाले. पाटण शहरासह परिसरातील गावांमध्ये त्यांचा गट आहे. दोन वर्षापूर्वी त्यांची पाटण शेती उत्पन्न बाजार समितीच्या सभापतीपदी निवड झाली होती. मात्र, त्यांच्यावर अविश्वास ठराव आणल्याने त्यांनी माजी मंत्री पाटणकर गटापासून फारकत घेतली. आता विधानसभेच्या ऐन रणधुमाळीत आमदार शंभूराज देसाईंनी विक्रमबाबांची त्यांच्या निवासस्थानी जाऊन भेट घेतल्याने पाटणच्या राजकीय वर्तुळात चर्चांना उधान आले आहे. सरदार घराण्यातील विक्रमबाबांना गळाला लावून शंभूराजेंनी मास्टरस्ट्रोक खेळला आहे.
हेही वाचा- छत्रपती उदयनराजे भोसलेंचा शाही दसरा उत्सव
