सातारा - परतीच्या पावसाने मोठ्या प्रमाणात हजेरी लावल्याने जिल्ह्यात विविध ठिकाणी पिकांचे नुकसान झाल्याचे समोर आले आहे. साताऱ्याच्या दुष्काळी भागालाही पावसाचा मोठा तडाखा बसला असून शेतांमध्ये सर्वत्र पाणी साचले आहे.
शनिवारपासून या पावसाचे थैमान सुरू असून काढणीला आलेला खरीप हंगाम वाया जाण्याची शक्यता आहे. साताऱ्याच्या दुष्काळी भागालाही पावसाचा मोठा तडाखा बसला असून शेतांमध्ये पाणी साचले आहे. खरीप हंगामातील पिकांच्या काढणीची कामं सध्या सुरू आहेत. सोयाबीन, घेवडा तसेच भुईमुगाच्या शेंगाना यामुळे फटका बसलाय. काही ठिकाणी या पिकांची काढणी सुरू असतानाच पाऊस बरसल्याने मळणीची कामंही खोळंबली आहेत.
जिल्ह्याच्या उत्तर भागात ढगफुटीसदृष्य पाऊस..
सातारा, कराड, पाटण तसेच कोरेगाव, माण, खटाव, फलटण तालुक्यांमध्ये विजांच्या कडकडाटासह दमदार पाऊस सुरू आहे. दुष्काळी माण, खटावमध्ये काल रात्रीपासून मुसळधार पाऊस पडत आहे. खटाव तालुक्याच्या उत्तर भागातील पुसेगावपासून बुध, डिस्कळपर्यंत ढगफुटीसदृष्य पाऊस झाला असून पिकांचे मोठे नुकसान झाले आहे. यामुळे खरीप पिकांच्या नुकसानीचे पंचनामे करण्याची मागणी शेतकऱ्यांनी केली आहे.
