सातारा : शिक्षणासाठी धरणाच्या पाण्यातून होडी चालवत, खिरखंडी गावातील मुलांना शाळेला जावे लागत होते. उच्च न्यायालयाने (High Court Order) त्यांची दखल घेतल्यानंतर, नूतन जिल्हाधिकारी (Collector) रूचेश जयवंशी यांनी प्रशासकीय अधिकार्‍यांसमवेत खिरखिंडी गावाला भेट दिली. यावेळी त्यांनी पाण्यातून होडी चालवत शाळेत जाणाऱ्या, विद्यार्थ्यांची आश्रमशाळेमध्ये राहण्याची आणि शिक्षणाची व्यवस्था केली आहे. तसेच ग्रामस्थांच्या पुनर्वसनाचा (Rehabilitation of Khirkhandi village) आठ दिवसांत निर्णय घेणार असल्याचे, देखील जिल्हाधिकार्‍यांनी सांगितले.
पुनर्वसनानंतरही सहा कुटुंबांचे खिरखिंडीतच वास्तव्य : जावळी तालुक्यातील खिरखिंडी गावामध्ये पूर्वी 70 कुटुंबे वास्तव्यास होती. कोयना धरणाच्या निर्मितीमुळे या गावाचे ठाणे जिल्ह्यातील एकसाल सागाव (ता. भिवंडी) येथे पुनर्वसन झाले. तथापि, पुनर्वसनानंतरही 7 कुटुंबांनी जमिनीचा ताबा घेतला नाही. त्यानंतर, केवळ एका कुटुंबाने जमिन ताब्यात घेतली. त्यामुळे सहा कुटुंबातील लोक आजही खिरखंडीतच वास्तव्यास आहेत. यामुळे या कुटुंबातील मुलांना, धरणाच्या पाण्यातून स्वत: होडी चालवत शाळेला जावे लागत होते. विद्यार्थ्यांच्या या जीवघेण्या प्रवासाची उच्च न्यायालयाने गंभीर दखल घेत, प्रशासनाला उपाययोजना करण्याचे आदेश दिले होते.
प्रशासकीय अधिकार्‍यांची खिरखिंडीला भेट : उच्च न्यायालयाने खिरखिंडी ग्रामस्थांसाठी कायमस्वरुपी उपाययोजना करण्यास सांगितल्यानंतर, सातारा जिल्हा प्रशासनाने तातडीने कार्यवाही सुरू केली आहे. जिल्हाधिकारी रुचेश जयवंशी, मुख्य कार्यकारी अधिकारी विनय गौडा, प्रांताधिकारी मिनाज मुल्ला, शिक्षणाधिकारी शबनम मुजावर, सहाय्यक वन संरक्षक सुरेश साळुंखे, तहसिलदार राजेंद्र पोळ, गटशिक्षणाधिकारी चंद्रकांत कर्णे, वनक्षेत्रपाल बाळकृष्ण हसबनीस, राम पवार, विजय देशमुख, अशोक मनुकर, दीपक भुजबळ हे प्रशासकीय अधिकारी खिरखिंडी गावात पोहोचले. ग्रामस्थांशी संवाद साधून तेथील विद्यार्थ्यांची आश्रमशाळेत राहण्याची आणि शिक्षणाची व्यवस्था केली. तसेच पुनर्वसनाचा निर्णयही आठ दिवसात घेणार असल्याचे, जिल्हाधिकारी जयवंशी यांनी सांगितले.
हेही वाचा : Mumbai Crime : मुंबईत धक्कादायक प्रकार ! महिला मारणार होती उंदीर पण जीव गेला तिचाच
