कराडमध्ये पोलिसांच्या नाकाबंदीमुळे रात्री 11 नंतर सामसूम

कोरोनाच्या पार्श्वभूमीवर नववर्षाच्या स्वागत घरात राहून करण्याचे आवाहन शासनाने केले होते. यामुळे रात्री ११ नंतर कराडमध्ये नाकाबंदी करण्यात आली आहे.

कराड (सातारा) - कोरोनाच्या पार्श्वभूमीवर नववर्षाचे स्वागत घरात राहून करण्याचे आवाहन शासनाने केले होते. या अनुषंगाने पोलिसांनी हॉटेल्स, ढाबे रात्री 11 नंतर बंद करण्याच्या सूचना केल्या होत्या. त्यामुळे कराडमध्ये सामसूम पहायला मिळाली. नाकाबंदीवेळी मद्य प्राशन करून गाडी चालविणार्‍यांवर गुन्हेही दाखल करण्यात आले आहेत.

कोरोनाच्या पार्श्वभूमीवर नववर्षाचे स्वागत घरात राहून करा, असे आवाहन शासनाने केले होते. या अनुषंगाने पोलिसांनी हॉटेल्स, ढाबे रात्री 11 नंतर बंद करण्याच्या सूचना केल्या होत्या. कराडमधील मुख्य चौकांसह शहरात येणार्‍या आणि बाहेर जाणार्‍या मार्गांवर नाकाबंदीही केली होती. त्यामुळे तरूणांच्या हुल्लडबाजीला चांगलाच चाप बसला. परिणामी रस्त्यांवर सामसूम पहायला मिळाली. नाकाबंदी दरम्यान, पोलिसांनी मोटर वाहन कायद्यान्वये अनेक वाहनधारकांवर दंडात्मक कारवाई केली. यामध्ये काही जणांवर ड्रंक अ‍ॅण्ड ड्राईव्हचे गुन्हेही दाखल झाले आहेत.

गृहराज्यमंत्री शंभूराज देसाई यांनीसुध्दा नववर्षाच्या पूर्वसंध्येला सातार्‍यात फेरफटका मारून कायदा, सुव्यवस्थेची पहाणी केली. त्यांच्या समवेत सातारचे पोलीस अधीक्षक अजयकुमार बन्सल होते. सातार्‍यातील पोवई नाका, मोती चौक, राजवाडा, बोगदा, बॉम्बे रेस्टॉरंट चौक येथे भेट देऊन गृहराज्यमंत्र्यांनी पोलीस बंदोबस्ताची पाहणी केली. पोलीस मुख्यालयातून जिल्ह्यातील सर्व पोलीस यंत्रणेला वायरलेसवरून कायदा व सुव्यवस्था कडकपणे राबविण्याच्या सूचना दिल्या. याच बरोबर पोलीस अधिकारी आणि कर्मचार्‍यांना नववर्षाच्या शुभेच्छाही दिल्या.

वाढदिवस असतानाही पोलीस निरीक्षकाचे कर्तव्याला प्राधान्य -

कराड शहर पोलीस ठाण्याचे वरिष्ठ पोलीस निरीक्षक बी. आर. पाटील यांचा गुरूवारी वाढदिवस होता. दिवसभर त्यांच्यावर शुभेच्छांचा वर्षाव झाला. मात्र, त्यांनी स्वत:च्या वाढदिवसापेक्षा कर्तव्याला प्राधान्य दिले. सरत्या वर्षाला निरोप आणि नववर्ष स्वागताचा बंदोबस्तामुळे त्यांना कर्तव्यावर उपस्थित राहावे लागले. त्यांना शुभेच्छा देण्यासाठी अनेक मान्यवर पोलीस ठाण्यात आले होते. मात्र, पोलीस निरीक्षक बी. आर. पाटील हे मात्र शहरात गस्तीवर होते.

कराडमधील नाकाबंदीमुळे अनेकांची तंतरली -

कराड शहरात येणार्‍या आणि बाहेर जाणार्‍या सर्व मार्गांवर पोलीस बंदोबस्त होता. त्यामुळे सरत्या वर्षाला निरोप आणि नववर्षाचा जल्लोष करणार्‍यांची चांगलीच तंतरली. रात्री एक पर्यंत पोलिसांना बंदोबस्तावर तैनात करण्यात आले होते. त्यामुळे रात्री 11 नंतर कराडसह परिसरात सामसूम झाली.