सातारा - पुणे जिल्ह्यातील खेड -आळंदी विधानसभा मतदार संघाचे राष्ट्रवादी काँग्रेसचे आमदार दिलीप मोहिते-पाटील यांना बदनाम करण्यासाठी रचण्यात आलेले हनी ट्रॅपचे षड्यंत्र साताऱ्यात उघडकीस आले. विशेष म्हणजे एका युवतीने या प्रकरणाचा भांडाफोड केला असून या प्रकरणी सातारा तालुका पोलीस ठाण्यात तिघांवर गुन्हा दाखल झाला आहे.
युवतीने केला भांडाफोड -
शैलेश शिवाजी मोहिते पाटील (रा. सांगवी, पुणे), राहुल किसन कांडगे (चाकण, पुणे) व सोमनाथ दिलीप शेडगे (सातारा) अशी संशयितांची नावे आहेत. या प्रकरणी मयूर साहेबराव मोहिते पाटील (वय 35, शेलपिंपळगाव, खेड पुणे) यांनी फिर्याद दिली आहे. पोलिसांनी सांगितले की, या संशयितांनी साताऱ्यातील एका युवतीच्या माध्यमातून आमदार दिलीप मोहिते पाटील यांना हनी ट्रॅप मध्ये अडकवायचे. बदनामीची भीती दाखवत त्यांच्याकडून लाखो रुपये उकळायचे, असा डाव आखला होता. त्या बदल्यात त्या युवतीला काही रक्कम संशयितांनी दिली होती. मात्र, युवतीने संशयितांचा भांडाफोड करून हे प्रकरण उघडकीस आणले. 22 एप्रिलला साताऱ्यातील त्या युवतीने मयूर यांना फोन करून या प्रकाराबाबत माहिती दिली. त्यांनी सातारा पोलिसांशी संपर्क साधला. पोलिसांनी संबंधित युतीकडे चौकशी केली असता हा सर्व प्रकार समोर आला.
असा होता डाव -
साताऱ्यात राहणारा सोमनाथ शेडगे हा तिचा मित्र असून त्याच्या ओळखीने शैलेश मोहिते व राहुल कांडगे हे दोघे 12 एप्रिलला साताऱ्यात संबंधित युवतीला भेटण्यासाठी आले होते. त्यांनी युवतीला आपल्याला आमदार मोहिते पाटील यांची बदनामी करायची असून त्यासाठी मदत पाहिजे असल्याचे सांगितले. या बदल्यात संशयितांनी युवतीला काही रक्कम व पुण्यात एक फ्लॅट देण्याचे आमिष दाखवले. नोकरीच्या बहाण्याने आमदार मोहिते पाटील यांच्याकडे जाऊन त्यांच्याशी संपर्क वाढवायचा आणि त्यांची बदनामी करायची असा प्लॅन संशयितांनी युवतीला सांगितला. त्या बदल्यात तिला वेळोवेळी एकूण 90 हजार रुपये देण्यात आले.
हा सगळा प्रकार मनाला न पटल्यामुळे त्या युवतीने आमदारांचे पुतणे व यातील तक्रारदार मयुर यांना फोन करून हकीकत सांगितली. सातारा तालुका पोलीस ठाण्याचे पोलीस निरीक्षक सजन हंकारे यांनी तत्काळ संबंधित युवतीची चौकशी करून त्यातील काही महत्त्वाचे पुरावे हाती घेतले. त्यानंतर संबंधितांविरुद्ध गुन्हा दाखल केला. युवतीचा मित्र सोमनाथ शेडगे यांना पुण्यातील संशयित पैसे देत होते. त्यातील काही पैसे सोमनाथ स्वतः जवळ ठेवायचा. उरलेली रक्कम संबंधित युवतीला देत होता, असे पोलीस तपासात समोर आले आहे.
