कराड (सातारा) - पाटण विधानसभा मतदारसंघात शांततेत मतदान पार पडले. दिवसभरात मतदारसंघातील २३ ठिकाणी मतदान यंत्रांमध्ये बिघाड झाल्याने मतदान प्रक्रिया काही काळ थांबली होती. नवीन मतदान यंत्रे दिल्यानंतर मतदान प्रक्रिया सुरळीत झाली. अनेक ठिकाणी सायंकाळी सहानंतरही मतदान प्रक्रिया सुरू होती.
हेही वाचा - मालवणीत तृतीयपंथी बांधवांनी बजावला मतदानाचा हक्क
पाटण विधानसभा व सातारा लोकसभा पोटनिवडणुकीसाठी सोमवारी पाटण मतदारसंघात सरासरी ६६ टक्के मतदान झाले. माजी मंत्री विक्रमसिंह पाटणकर, महाआघाडीचे उमेदवार सत्यजितसिंह पाटणकर व त्यांच्या कुटुंबीयांनी जिल्हा परिषद प्राथमिक शाळेत मतदान केले. महायुतीचे उमेदवार आमदार शंभूराज देसाई यांनी कुटुंबासह मरळी येथे मतदान केले. मतदान यंत्रांमधील बिघाडाचा अपवाद वगळता मतदान प्रक्रिया शांततेत पार पडले.
हेही वाचा - एक्झिट पोलमध्ये राज ठाकरेंना धक्का; मतदारांनी पुन्हा नाकारले?
मतदान केंद्रांवर लहान मुलांसाठी पाळणा घराची आणि अपंग मतदारांसाठी व्हीलचेअरची सोय करण्यात आली होती. वृद्ध, अपंग मतदारांना वाहनांमधून आणण्यात येत होते. पाटण विधानसभा मतदारसंघात एकूण 9 उमेदवार निवडणुकीच्या रिंगणात होते.
दंगल नियंत्रण पथकाच्या गाडीला अपघात -
निवडणुकीच्या पार्श्वभूमीवर कायदा, सुव्यवस्था राखण्यासाठी दंगल नियंत्रक पथकाची गस्त सुरू होती. या पथकाच्या गाडीचे ब्रेक फेल झाल्याने पाटण-तारळे मार्गावरील गुजरवाडी घाटात गाडीला अपघात झाला. अपघातात ४ जण गंभीर आणि १२ जण किरकोळ जखमी झाले आहेत. जखमींवर पाटणच्या ग्रामीण रूग्णालयात प्राथमिक उपचार करून पुढील उपचारासाठी कराडला आणण्यात आले.
