सातारा : कडक उन्हामुळे अंगाची लाहीलाही होत असताना महाराष्ट्राचे नंदनवन महाबळेशवरमधील तापमानात घट झाली आहे. महाबळेश्वरमध्ये 12 तर वेण्णा लेक परिसरातील तापमान 9 अंगावर आल्याचे पाहायला मिळाले. महाबळेश्वरच्या या थंड वातावरणाचा पर्यटक सध्या चांगलाच आनंद लुटत आहेत. सुट्टीमुळे सध्या महाबळेश्वर, पाचगणी ही पर्यटनस्थळे पर्यटकांनी गजबजून गेली आहेत.
महाराष्ट्राचे मिनी काश्मीर गारठले : ऐन उन्हाळ्यात महाबळेश्वरचे तापमान खालावले आहे. महाबळेश्वरमध्ये 12 अंश सेल्सिअस तर वेण्णालेक परिसरातील तापमान 9 अंशावर आले आहे. मागील आठवड्यात याच परिसरात दवबिंदूंचे हिमकणात रूपांतर झाले होते. लिंगमळा, वेण्णा लेक या परिसरातील थंड वातावरण पर्यटकांना सुखावते. सध्याच्या कडक उन्हात देखील महाबळेश्वरमध्ये थंडी जाणवत असल्याने पर्यटक या थंडगार वातावरणाचा आनंद लुटत आहेत.
धुके आणि थंडीचा नजारा : मागील काही दिवसांत अवकाळी पावसाने झोपडल्यानंतर सातारा जिल्ह्यातील तापमानात घट झाली होती. दिवसभर कडक उन्हाळा जाणवत असला तरी पहाटे कडाक्याची थंडी आणि धुके देखील पाहायला मिळाले. महाराष्ट्राचे मिनी काश्मीर म्हणून ओळखल्या जाणार्‍या महाबळेश्वरातील किमान तापमानात मोठी घट होऊन दवबिंदू गोठल्याचे चित्र मार्च महिन्याच्या शेवटी पाहायला मिळाले.
उन्हाळी सुट्टीमुळे पर्यटकांची गर्दी वाढली : महाबळेश्वरमध्ये अगदी मार्च महिन्याच्या अखेरीसपर्यंत कडाक्याची थंडी होती.दवबिंदू गोठून त्याचे हिमकणात रूपांतर झाले होते. वेण्णा लेक जेट्टीसह वाहनांच्या टपांवर हिमकण जमा झाले होते. महाबळेश्वरसह वाई, पाचगणी, भोसे या परिसरातील तापमानात देखील घट झाली होती. त्यामुळे पर्यटक ऐन उन्हाळ्यात काश्मीरसारख्या थंड वातावरणाचा अनुभव घेत होते.
महाबळेश्वरच्या तापमानात पुन्हा घट : एप्रिलच्या सुरूवातीपासून जिल्ह्यातील तापमानात मोठी वाढ झाली. संपुर्ण जिल्ह्याला उन्हाचे चटके बसू लागले. त्यानंतर जिल्ह्याच्या पश्चिम आणि पूर्व भागात अवकाळी पाऊस आणि गारपीट झाली. दक्षिण आणि उत्तरेकडे अजुन जोरदार अवकाळी पाऊस झालेला नाही. त्यामुळे उन्हाचे चटके बसत आहेत. असे असताना महाबळेश्वरच्या तापमानात घट झाली आहे. महाबळेश्वरमधील तापमान 9 अंशापर्यंत खाली आले आहे.
हेही वाचा : एमपीएससीच्या विद्यार्थ्यांचे हॉलतिकीट लिक झाल्याचा व्हिडिओ व्हायरल, परीक्षा वेळेप्रमाणेच होणार
