सांगली- अंकली येथे दुचाकी, चारचाकी आणि एसटीचा भीषण अपघात झाला. या तिहेरी अपघातामध्ये दोघांचा मृत्यू झाला आहे. ही घटना रविवारी रात्री मिरज-कोल्हापूर रोडवरील अंकली येथे घडली.
प्रवीण हुचगोळ (वय २६) आणि मनोज कांबळे (वय २५), असे मृत व्यक्तींची नावे आहेत. हे दोघेही विटभट्टी कामगार असून अंकलीजवळच्या इनाम धामणी येथील रहिवासी आहेत. दोघेही काम आटोपल्यानंतर काही कामानिमित्त आपल्या दुचाकीवरून अंकलीकडे निघाले होते. यावेळी एसटी बसला ओव्हरटेक करताना समोरून येणाऱ्या भरधाव चारचाकी वाहनाची दुचाकीला धडक बसली. त्यामुळे तिन्ही वाहनांची एकमेकांनाही जोरदार धडक झाली. यावेळी चारचाकी वाहन उलटून रस्त्याच्या पलीकडे गेले. जखमी दुचाकीस्वारांना तातडीने सांगलीच्या शासकीय रुग्णालयात दाखल करण्यात आले. मात्र, त्या दोघांचा उपचारापूर्वीच मृत्यू झाला. या अपघाताची नोंद सांगली ग्रामीण पोलीस ठाण्यात करण्यात आली आहे.
