सांगली - निसर्गाची मुक्त उधळण असलेल्या कर्नाटकातील गोकाक धबधबा ओसंडून वाहू लागला आहे. शेकडो फुटांवरून कोसळणाऱ्या आणि मनात धडकी भरवण्याबरोबर मन प्रसन्न करणाऱ्या विलोभनीय, अशा या गोकाक फॉल्सचे रूप पाहण्यासाठी पर्यटकांची गर्दी वाढू लागली आहे. महाराष्ट्रातील काही हौशी पर्यटकांनी गोकाक फॉल्सचे व्हिडीओ ईटीव्ही भारतसोबत शेअर केले आहेत.
भारतातील नायगरा फॉल्स म्हणून ओळखला जाणारा कर्नाटकमधला गोकाक फॉल्स पावसामुळे प्रवाहित झाला आहे. कर्नाटक राज्याच्या बेळगाव जिल्ह्यातील गोकाकजवळील असणाऱ्या कोन्नूर येथे घटप्रभा नदीवर हा धबधबा आहे. आज हा धबधबा देशभरात नव्हे तर जगभरात पर्यटकांना साद घालत असतो. सुमारे १७१ फुटांवरून हा धबधबा कोसळतो. पावसाळा सुरू झाला, की या ठिकाणी लाखो पर्यटक अद्वितीय धबधबा पाहण्यासाठी गर्दी करतात.
यंदा उशिरा सुरू झालेल्या मान्सूनमुळे गोकाकचा धबधबा प्रवाहित होण्यास थोडा उशीर झाला असला तरी आता धबधबा पूर्ण क्षमतेने वाहू लागला आहे. या धबधब्याचे वैशिष्ट्य म्हणजे हा विशाल धबधबा चारही दिशेने पर्यटकांना पाहता येतो. विशेष म्हणजे जेथून हा धबधबा शेकडो फूट खाली कोसळतो त्या स्पॉटपर्यंत पर्यटकांना सहज पोहचता येते. तर ज्या घटप्रभा नदीवरून हा धबधबा खाली कोसळतो, त्या धबधब्याच्या काही अंतरावर ब्रिटिशांनी एक पूल उभारला असून तो झुलता पूल म्हणून ओळखला जातो. ६५९ फूट लांबीचा हा झुलता पूल आजही मोठ्या दिमाखात उभा आहे. पाण्याचा कितीही मोठा प्रवाह असला तरी खडकांवर उभारलेला हा पूल अजूनही उत्तम स्थितीत आहे. गोकाकचा धबधबा जणू निसर्गाचा एक अद्भुत आविष्कार असाच म्हणावा लागेल. ज्या क्षमतेने हा धबधबा कोसळतो ते पाहून मनात धडक तर भरतेच शिवाय डोळ्यांचे पारणेसुद्धा फिटते.
