सांगली - कर्नाटक राज्यात जाणारे ऊस वाहतूक ट्रॅक्टरची हवा सोडून ते सांगलीच्या कवठे महाकाळ तालुक्यात अडवण्यात आले. रघुनाथ पाटलांच्या शेतकरी संघटनेकडून हे आंदोलन करण्यात आले. ऊस दरात वाढ करण्यात यावी अशी मागणी शेतकरी संघटनेकडून करण्यात आली.
ऊसाला अधिकचा दर आणि एकरकमी एफआरपी या मागणीसाठी शेतकरी संघटनाही आता मैदानात उतरली आहे. सांगलीच्या कवठे महाकाळ तालुक्यात सुरू असलेली ऊस तोड शेतकरी संघटनेचे जिल्हाध्यक्ष अशोक माने यांच्या नेतृत्वाखाली बंद पडण्यात आल्या. या ठिकाणी असणारा ऊस हा शेजारच्या कर्नाटक राज्यातील अथणी शुगर आणि साईप्रिया साखर कारखान्यात नेला जातो.
हेही वाचा - शेतकऱ्यांसाठी जाहीर केलेली मदत कमी - मकरंद अनासपुरे
यावेळी माने व संघटनेच्या कार्यकर्त्यांनी शेतकऱ्यांना ऊस तोड करू नये अशी विनंती केली. तर संध्याकाळी याचा भागात सुरू असलेली ऊस वाहतूक शेतकरी संघटनेच्या कार्यकर्त्यांनी रोखली आहे. कर्नाटकमध्ये जाणाऱ्या ऊसाच्या ट्रॅकटर ट्रॉली रोखून त्यांच्या चाकाची हवा टोचा मारून सोडण्यात आली. यामुळे या भागातून सुरू असलेली ऊस वाहतूक बंद पडली आहे. ऊसाचा अंतिम दर व एकरकमी एफआरपी ठरल्याशिवाय ऊसाची कांडी साखर कारखान्याला जाऊ देणार नाही, असा इशारा यावेळी शेतकरी संघटनेचे जिल्हाध्यक्ष अशोक माने यांनी दिला आहे.
