सांगली - जिल्ह्यातील शिराळा विधानसभा मतदारसंघातील काँग्रेसचे निष्ठावंत म्हणून परिचित असलेले दिवंगत शिवाजीराव देशमुख यांचे चिरंजीव सत्यजित देशमुख हे आता भाजपमधून काँग्रेसमध्ये घरवापसी करणार आहेत. मतदारसंघातील त्यांच्या कार्यकर्त्यांमध्येही या बातमीची चर्चा सुरू आहे.
हेही वाचा - कोल्हापुरात मटणाचे दर कडाडले, खवय्ये नाराज
एकंदरीत सत्यजित देशमुख यांच्या घरवापसीला घेऊन मतदारसंघात चर्चेचे रान उठले आहे. शिराळा विधानसभा निवडणुकीच्या दरम्यान सत्यजित देशमुख यांनी काँग्रेस पक्षाला रामराम ठोकून भाजप पक्षात प्रवेश केला. देशमुख यांचा भाजपमध्ये प्रवेश होताना देवेंद्र फडणवीस आणि चंद्रकांत पाटील यांच्याशी पुढील वाटाघाटीच्या संदर्भात चर्चा होऊनच त्यांनी प्रवेश केला होता. त्यांच्या भाजप प्रवेशाच्या पूर्वी मतदारसंघात ते काँग्रेसला सोडचिठ्ठी देऊन भाजपमध्ये जाणार असल्याच्या चर्चाचे वादळ फार मोठे होते. भाजप प्रवेश निश्चित झाला त्यावेळेला त्यांना विधानसभेचे तिकीट देण्यात येणार असल्याचे काँग्रेसच्या कार्यकर्त्यांकडून सांगितले जात होते. तत्कालीन आमदार शिवाजीराव नाईक यांना विधानपरिषद देऊन सत्यजित देशमुख यांना भाजपकडून विधानसभेचे तिकीट देण्याचे ठरले असल्याचे सत्यजित देशमुख यांच्या कार्यकर्त्यांकडून सांगितले जात होते.
त्या धर्तीवरती दोघांनाही भाजपकडून तसेच भाजप पक्षश्रेष्ठींकडून विधानसभेसाठी अर्ज दाखल करण्यास सांगितले गेले. दोघांनीही हे अर्ज दाखल केले व पक्षश्रेष्ठी जो निर्णय देतील तो मान्य करण्याचे सांगितले होते. अर्ज माघारीच्या दिवशी भाजप पक्षश्रेष्ठींकडून तत्कालीन आमदार शिवाजीराव नाईक यांना भाजपकडून एबी फॉर्म देण्यात आला. सहाजिकच शिवाजीराव नाईक यांच्यावरती भाजपकडून तिकीटासाठी शिक्कामोर्तब करण्यात आला व सत्यजित देशमुख यांना माघार घेण्यास सांगितले. ठरल्याप्रमाणे पक्षश्रेष्ठींचा आदेश मान्य करायचा त्याप्रमाणे सत्यजित देशमुख यांनी त्यांचा अर्ज माघारी काढून घेतला.
हेही वाचा - ऊस आंदोलनाला हिंसक वळण, एक ट्रॅक्टर पेटवला
विधानसभेच्या रिंगणात भाजपकडून शिवाजीराव नाईक, राष्ट्रवादीकडून मानसिंगराव नाईक तर अपक्ष म्हणून सम्राट महाडिक यांच्यात प्रमुख लढत होती. सत्यजित देशमुख यांनी पायाला भिंगरी बांधून शिराळा विधानसभा मतदारसंघात शिवाजीराव नाईक यांचा प्रचार केला. शिवाजीराव नाईक यांचा गट व सत्यजित देशमुख यांचा गट मिळून निश्चित विजय मिळण्याची खात्री त्यांना होती. या खात्रीवरती शिवाजीराव नाईक हे पुन्हा आमदार होणार असे ठामपणे दोघांच्याही कार्यकर्त्यांकडून सांगितले जात होते.
शिवाजीराव नाईक हे निवडून आल्यानंतर त्यांना विधानसभा व सत्यजित देशमुख यांना विधानपरिषद असे एकंदरीत गणित भाजप पक्षश्रेष्ठींकडून दोघांनाही सांगण्यात आले होते. त्यामुळे दोघांचे कार्यकर्ते एकसंघपणे शिवाजीराव नाईक यांच्या विजयासाठी कार्यरत राहिले. दरम्यानच्या काळात शिराळा विधानसभा मतदारसंघातील ४८ गावातून सम्राट महाडिक यांची प्रथमच ४८ गावातील उमेदवार म्हणून उमेदवारी राहिली होती. त्यामुळे त्यांनाही या ४८ गावातून भरघोस मते मिळतील अशी अपेक्षा होती. तशी त्यांनी ती अपेक्षा गृहीत धरूनच निवडणूक लढवली. राष्ट्रवादीचे मानसिंगराव नाईक यांनी गत पराभवापासूनच २०१९ च्या विधानसभेची तयारी सुरू केली होती. २०१९ च्या विधानसभेचे मैदान मीच मारणार असा ठाम विश्वास त्यांनी व्यासपीठावरतीही करून दाखवला होता.
शिराळा विधानसभा मतदारसंघात सत्यजित देशमुख आणि शिवाजीराव नाईक यांनी गृहीत धरून केलेल्या नियोजनाला अपयश आले. तब्बल 25 हजाराच्या मताधिक्याने राष्ट्रवादीचे मानसिंगराव नाईक निवडून आले. मानसिंगराव नाईक यांच्या विजयाने शिवाजीराव नाईक व सत्यजीत देशमुख या दोघांच्याही गोटात पुन्हा संभ्रमाची अवस्था निर्माण झाली. शिवाजीराव नाईक हे आमदार झाले तरच सत्यजित देशमुख यांना विधानपरिषद दिली जाईल, असे एकंदरीत संकेत होते. परंतु, आता शिवाजीराव नाईक हेच पराभूत झाल्याने सत्यजित देशमुख यांचा कोणताच ठावठिकाणा भाजपमध्ये लागणार नसल्याच्या पुन्हा चर्चा मतदारसंघात रंगू लागल्या. किंबहुना शिवाजीराव नाईक यांच्या पराभवामुळे आता सत्यजित देशमुख यांची कोंडी होणार असे खुद्द सत्यजित देशमुख यांच्या कार्यकर्त्यांकडून बोलले जाऊ लागले.
आता तर राज्यात भाजपचे सरकारही स्थापन होणार नसल्याची चिन्हे दिसू लागली आहेत. काँग्रेस-राष्ट्रवादी व शिवसेना हे तिघे मिळून सरकार स्थापन करण्याच्या हालचाली मोठ्या प्रमाणात सुरू आहेत. या धरतीवरती शिराळा विधानसभा मतदारसंघात सत्यजित देशमुख पुन्हा काँग्रेस पक्षात घरवापसी करणार असल्याच्या चर्चा आहेत. भाजपचे सरकार नसल्याने सत्यजित देशमुख यांना कुठेच संधी मिळणार नाही असेही बोलले जात आहे. काँग्रेस सत्तेत आली तर पुन्हा सत्यजित देशमुख यांचा सहानुभूतीने विचार करतील, अशा एकंदरीत चर्चा सध्या मतदारसंघात आहेत.
निर्णयावरती ठाम -
भाजपमध्ये अलीकडेच मी पक्ष प्रवेश केला असून भाजपमध्येच मी राहणार आहे. कोकरूड जिल्हा परिषद मतदारसंघात उमेदवार उभा केला जाणार आहे, तो भाजपच्या चिन्हावरतीच उभा केला जाणार आहे. त्यामुळे मी काँग्रेस पक्षात पुन्हा घरवापसी करणार असल्याच्या फक्त चर्चाच आहेत. मी घेतलेल्या निर्णयावरती ठाम असल्याचे सत्यजित देशमुख यांनी सांगितले.
