सांगली - जिल्ह्यातील 8 विधानसभा मतदारसंघासाठी सोमवारी मतदान होणार आहे. यासाठी जिल्हा प्रशासनाकडून जय्यत तयारी करण्यात आली आहे. एकूण 2435 मतदान केंद्रांवर मतदान होणार असून 23 लाख 76 हजार 304 मतदार मतदानाचा हक्का बजावणार आहेत. यासाठी पोलीस बंदोबस्तात शनिवारी ईव्हीएम रवाना झाले.
2435 नियोजित मतदान केंद्रांपैकी 39 मतदान केंद्रे ही संवेदनशील आहेत. मतदान प्रक्रिया सुरळीत पार पाडण्यासाठी एकूण 11 हजार 230 कर्मचारी कार्यरत आहेत. अडीच हजार पोलीस कर्मचारी आणि 1600 होमगार्ड व राज्य राखीव दलाच्या तुकड्या तैनात केल्या आहेत. तर संवेदनशील मतदार केंद्रांच्या ठिकाणी अतिरिक्त बंदोबस्त तैनात करण्यात येणार आहे.
हेही वाचा - महाराष्ट्रात २७६२ मतदान केंद्रे संवेदनशील! ९६७३ केंद्राचे होणार लाइव्ह वेबकास्ट
मतदान प्रक्रिया शांततेत व सुरळीत पार पाडण्यासाठी जिल्हा प्रशासनाकडून चोख नियोजन करण्यात आले आहे. यावेळी मतदानाची टक्केवारी वाढण्यासाठी विशेष उपक्रम राबवले असून जवळपास 94 टक्के मतदारांपर्यंत वोटर स्लिप पोहोच करण्यात आले आहेत. त्यामुळे यंदाच्या विधानसभा निवडणूकीत मतदानाची टक्केवारी वाढेल, असा विश्वास जिल्हाधिकारी अभिजित चौधरी यांनी व्यक्त केला. जनतेने मतदानाचा हक्क बाजावा असे आवाहनही चौधरी यांनी केले आहे.
