सांगली : ट्रॉलीतून वाहून गेलेल्या तरुणाचा दोन दिवसांनंतर सापडला मृतदेह

जत तालुक्यात आठवडाभरापासून सुरू असलेल्या पावसामुळे नद्या-नाले ओसंडून वाहत आहेत. अनेक ठिकाणी पुलावरून पाणी वाहत असताना नागरिक जीव धोक्यात घालून प्रवास करत असल्याचे समोर आले आहे.

सांगली - करजगी येथे पुलावरून वाहणाऱ्या प्रवाहात ट्रॅक्टर उलटा झाल्याची घटना गुरुवारी (15 ऑक्टोबर) घडली. या दुर्घटनेत पिंटू ऊर्फ परमेश्वर भीमराव धायगुडे (वय -32) हा तरुण वाहून गेला होता. दोन दिवसांच्या शोधमोहिमेनंतर अखेर शनिवारी (17ऑक्टोबर) त्याचा मृतदेह बोर नदीत सापडला.

जत तालुक्यात आठवडाभरापासून सुरू असलेल्या पावसामुळे नद्या-नाले ओसंडून वाहत आहेत. अनेक ठिकाणी पुलावरून पाणी वाहत असताना नागरिक जीव धोक्यात घालून प्रवास करत असल्याचे समोर आले आहे.

चेन्नई दूध डेअरीच्या दुधाची करजगी भिवर्गी पुलावरून ट्रॅक्टरमार्फत वाहतूक सुरू होती. यावेळी पिंटू धायगुडे ट्रॉलीमध्ये बसला होता. त्याने दोन वेळा दुधाची वाहतूक केली. मात्र शेवटच्या फेरीला पाण्याचा प्रवाह वाढल्याने ट्रॅक्टर पुलावरच अडकला; आणि प्रवाहामुळे उलटला. यावेळी चालक सोमलिंग लायप्पा पुजारी याने उडी मारल्याने तो बचावला.

पिंटू ऊर्फ परमेश्वर भीमराव धायगुडे (वय -32) हा तरुण वाहून गेला.

या घटनेनंतर स्थानिकांसह शासकीय यंत्रणेने त्याचा शोध सुरू केला. मात्र दोन दिवस शोधमोहिम हाती घेतल्यानंतरही पिंटू सापडला नाही. अखेर जिल्हा आपत्ती व्यवस्थापनाकडून शनिवारी सकाळी आयुष्य हेल्पलाइन पथकाला घटनास्थळी बोलावण्यात आले. अमोल व्हटकर, जाहीर मुजावर, कौशिक मुजावर, नागेश मासाळ यांनी ग्रामस्थांच्या मदतीने शोध घेतला. ड्रोन कॅमेऱ्याची देखील मदत घेण्यात आली. यावेळी दुर्घटना स्थळापासून पाचशे मीटर अंतरावर बोरी नदीत त्याचा मृतदेह आढळला.