सांगली - जेवण दिले नाही, या रागातून एका मुलाने आपल्या सख्ख्या आईची निर्घुण हत्या केल्याची धक्कादायक घटना घडली.कवठेमहांकाळ तालुक्यातल्या आगळगाव येथे हा प्रकार घडला. यामध्ये 70 वर्षीय राजक्का ज्ञानु जाधव यांचा मृत्यू झाला आहे. याप्रकरणी कवठेमंकाळ पोलीस ठाण्यामध्ये गुन्हा नोंद झाला आहे.
जेवण न दिल्याने मुलाने केली आईची हत्या, सांगलीतील धक्कादायक घटना याबाबत कवठेमहांकाळ पोलीस ठाण्याचे सहायक पोलीस निरीक्षक सागर गोडे यांनी दिलेली माहिती, आगळगाव मधील पाटील मळा याठिकाणी जाधव कुटुंब राहते. यातील दशरथ ज्ञानु जाधव हे 5 मे रोजी दुपारच्या सुमारास घरी आले होते. यावेळी त्यांची आई राजक्का ज्ञानू जाधव व मुलगा दशरथ ज्ञानु जाधव या दोघांमध्ये जेवण देण्याच्या कारणातून वाद झाला. या वादातून चिडलेल्या दशरथ ज्ञानु जाधव यांनी आई राजक्का यांच्या डोक्यावर वीट आणि लोखंडी रॉडने मारहाण केली. ज्यामध्ये राजक्का जाधव (वय 70) या गंभीर जखमी झाल्या होत्या. त्यानंतर जखमी राजक्का यांना मिरजेच्या शासकीय रुग्णालयमध्ये उपचारासाठी दाखल करण्यात आले होते. मात्र, उपचार सुरू असताना राजक्का जाधव यांचा मृत्यू झाला आहे. या प्रकरणी राजक्का जाधव यांचे नातू गणेश भोसले यांनी दशरथ जाधव यांच्या विरोधात तक्रार दिली असून त्यानुसार दशरथ जाधव यांच्यावर गुन्हा दाखल करण्यात आला. त्यानंतर दशरथ जाधव यास आईच्या खून प्रकरणी अटक करण्यात आली आहे.
