सांगली - गणेशाच्या आगमनाला अजून काही अवधी असला, तरी सांगलीमध्ये मात्र गणपती बाप्पा विराजमान झाले आहेत. "चोर गणपती" म्हणून संबोधल्या जाणाऱ्या सांगलीतील गणेश मंदिरात गणपतीची प्रतिष्ठापना करण्यात आली आहे. कोणताही गाजवजा न करत पहाटे भक्तिमय वातावरणात विधिवत पूजा करून प्रतिष्ठापना करण्यात आली. गणेश चतुर्थीच्या दोन दिवस अगोदर गणेशाची प्रतिष्ठापना करण्याची दोनशे वर्षांची परंपरा आजही कायम ठेवली आहे. गणपती मंदिराचे पुजारी रमेश पाटणकर यांनी ही माहिती दिली.
आले रे आले बाप्पा आले -
सांगलीचे आराध्य दैवत म्हणून गणरायाची ओळख आहे. संपूर्ण सांगलीकरांची या गणेशावर मोठी श्रद्धा आहे. सांगली गणपती पंचायतनतर्फे दरवर्षी गणेशोत्सव मोठ्या प्रमाणात साजरा करण्यात येतो. सांगली संस्थानचे राजे पटवर्धन यांनी गणेशोत्सव साजरा करण्याची प्रथा सुरू केली. दरवर्षी सांगलीमध्ये पटवर्धन घराण्याकडून हा गणेशोत्सव उत्साहात साजरा करण्यात येतो. मात्र कोरोनाच्या पार्श्वभूमीवर गेल्या वर्षभरापासून गणपती मंदिर भाविकांसाठी बंद आहे. मंदिरातील पुजारी यांच्याकडून दररोज पूजा केली जाते. आता काही दिवसांवर गणेशोत्सव येऊन ठेपला आहे. मात्र यंदाही गणेशोत्सवावर कोरोनाचे सावट आहे. कोरोनाचा प्रादुर्भाव लक्षात घेता गणपती पंचायतन ट्रस्टकडून साध्या पद्धतीने गणेशोत्सव साजरा करण्याचा निर्णय घेण्यात आला आहे. मात्र परंपरागत जोपासण्यात येणारी प्रथा मंदिर प्रशासनाने दरवर्षीप्रमाणे यंदाही जोपासली आहे. ती म्हणजे चोर गणपती प्रतिष्ठापणेची, अशी माहिती गणपती मंदिराचे पुजारी रमेश पाटणकर यांनी दिली आहे.
म्हणून म्हणतात "चोर गणपती" -
खरे तर गणेश चतुर्थीला सर्वत्र थाटामाटात गणेशाचे आगमन होते. मात्र गणपती पंचायतनमध्ये दोन दिवस अगोदर गणेशाचे आगमन होते. कोणालाही माहिती न पडता गणेशाची स्थापना होते, त्यामुळे या प्रथेला "चोर गणपती" म्हणून संबोधले जाते. सांगलीमध्ये गेल्या दोनशे वर्षाहून अधिक काळापासून ही परंपरा सुरु असून पटवर्धन घरण्याकडून ती जोपासण्यात येते. आज पहाटे गणेश मंदिरात प्रथेप्रमाणे या चोर गणपतीचे आगमन झाले आहे. भक्तिमय वातावरणात मुख्य गणपती मंदिरात चोर गणपतीची प्रतिष्ठापना करण्यात आली आहे. मंदिरातील मुख्य गणेश मूर्तीच्या दोन्ही बाजूला चोर गणपतीची प्रतिष्ठापणा करण्यात आली आहे.
दोनशे वर्षाची परंपरा -
विशेष म्हणजे या गणपतीचे विसर्जन होत नाही. या चोर गणपतीची मूर्ती कागदी लगदयापासून बनवली जाते. दीड दिवसानंतर हे चोर गणपती सुखरूप ठिकाणी हलवण्यात येतात. भाद्रपद शुद्ध प्रतिपदेला या चोर गणपतीचे प्रतिष्ठापणा करण्याची ही परंपरा असून आजही मोठ्या भक्तीने जोपसण्यात येते. या गणपती बरोबरच गणेश चतुर्थीला नियमित गणेशाची स्थापना होते. मात्र यंदाही गणेशोत्सवावर कोरोनाचे संकट कायम आहे, त्यामुळे गणपती पंचायतन ट्रस्टकडून साध्या पद्धतीने गणेशोत्सव यंदा साजरा करण्याचा निर्णय घेण्यात आला आहे, असे गणपती मंदिराचे पुजारी रमेश पाटणकर यांनी सांगितले आहे.
हेही वाचा - गणेशोत्सव कोरोनाचे निर्बंध पाळून साजरा करा - आरोग्यमंत्री
