सांगली - राष्ट्रवादी काँग्रेस नेते आनंदराव पाटील यांच्या हत्येचा अखेर उलगडा झाला आहे. पूर्ववैमनस्यातून 40 लाखांची सुपारी देऊन ही हत्या करण्यात आल्याचे उघडकीस आले आहे. या प्रकरणी सांगली पोलिसांनी चौघांना अटक केली आहे, अशी माहिती जिल्हा पोलीस सुहेल शर्मा यांनी दिली आहे.
राज्याचे उपमुख्यमंत्री अजित पवार यांचे खासगी सचिव गजानन पाटील यांचे बंधू आणि पलूस तालुक्यातील राष्ट्रवादीचे नेते आनंदराव पाटील यांच्या हत्या प्रकरणचा 8 दिवसानंतर छडा लावण्यात सांगली पोलिसांना यश आले आहे. दि. 2 फेब्रुवारी रोजी पलूसच्या खटाव येथे आनंदराव पाटील यांच्या हत्येची घटना घडला होती. यामुळे जिल्ह्यातील खळबळ उडाली होती.
हेही वाचा - खून का बदला खून? राष्ट्रवादी नेत्याच्या हत्ये प्रकरणी शिवसेना उपजिल्हाप्रमुखासह तिघांना अटक
या प्रकरणी सांगलीच्या स्थानिक गुन्हे अन्वेषण शाखेने गतीने तपास करत खुनाचा छडा लावला आहे. 40 लाख रुपयांची सुपारी देऊन आनंदराव पाटील यांचा खून झाल्याचे उघडकीस आणले आहे. वैयक्तिक वादातून हा खून झाल्याचे पोलीस तपासात निष्पन्न झाले आहे. या हत्या प्रकरणी चार संशयितांना अटक करण्यात आली आहे.
हेही वाचा - 'राष्ट्रवादी नेत्यांची हत्या दुर्दैवी, पोलीस लवकर तपास करून आरोपींवर कारवाई करतील'
जमीनीचा वाद आणि पूर्ववैमनस्यातून अरविंद पाटील आणि लक्ष्मण मडीवाल या गावातील दोघांनी पुण्याच्या अतुल जाधव आणि दत्तात्रय जाधव या दोघांना आनंदराव पाटील यांच्या हत्येसाठी 40 लाखांची सुपारी दिल्याचे समोर आले आहे. मडीवाल यांच्याशी पाटील यांचे पूर्ववैमनस्य होते तर अरविंद पाटील यांचे शेत आंनदराव पाटील यांनी विकत घेतले होते. या रागातून अरविंद पाटील व लक्ष्मण मडीवाल यांनी सुपारी देऊन आंनदराव पाटील यांचा काटा काढला आहे. या प्रकरणी पोलिसांनी अरविंद पाटील, लक्ष्मण मडीवाल, अतुल जाधव आणि दत्तात्रय जाधव या चौघांना अटक केली आहे.
सुरुवातीला राजकीय वादातून ही हत्या झाल्याचे बोलले जात होते. मात्र, संशयित आरोपी सापडल्यानंतर हा खून गावातील वैयक्तिक वादातून झाल्याचे निष्पन्न झाले, असे सांगलीचे पोलीस अधीक्षक सुहेल शर्मा यांनी सांगितले आहे.
हेही वाचा - धक्कादायक ! सांगलीत आणखी एका राष्ट्रवादीच्या नेत्याची हत्या
