सांगली - जिल्हा आणि शहरातील पूरग्रस्त भागातील महिला बचत गटांच्या कर्जमाफीसह विविध मागण्यांसाठी पूरग्रस्त महिलांनी सोमवारी मूकमोर्चा काढला. 'महिला कर्जमुक्ती अभियान' या संघटनेच्या नेतृत्वाखाली सांगलीच्या जिल्हाधिकारी कार्यालयावर मूक मोर्चा काढण्यात आला. यावेळी बँकांच्या सक्तीच्या कर्ज वसुली विरोधात तोंडाला काळ्या फिती लावून निषेध व्यक्त करण्यात आला. विश्रामबाग चौक येथून जिल्हाधिकारी कार्यालयापर्यंत निघालेल्या या मूक मोर्चामध्ये मोठ्या संख्येने महिला सहभागी झाल्या होत्या.
हेही वाचा... अमित शाह यांच्याकडून नागरिकत्व दुरुस्ती विधेयक लोकसभेत सादर, विधेयकाच्या बाजूने 293 तर विरोधामध्ये 82 मते
सांगली शहरात ऑगस्ट महिन्यात आलेल्या महापुरात हजारो कुटुंबांचे संसार उद्ध्वस्त झाले. सरकारकडून या पूरग्रस्त कुटुंबांना थोडीफार मदत देण्यात आली. मात्र या महापूराने सांगली जिल्ह्यातील अर्थव्यवस्था कोलमडली आहे. याचा फटका महिला बचत गटांना मोठ्या प्रमाणात बसला आहे. पूरग्रस्त भागातील हजारो महिलांनी बचत गटांच्या माध्यमातून मायक्रो फायनान्स व इतर वित्तीय संस्थांच्या कडून कर्जे घेतली आहेत. यामुळे या महिला बचत गटांची कर्जमाफी आणि वसुली थांबवण्याची मागणी अनेक राजकीय पक्ष आणि सामाजिक संघटनांनी सरकारकडे केली होती.
हेही वाचा... हैदराबाद एन्काऊंटर प्रकरणी SIT गठीत, टीमचं नेतृत्व 'या' मराठमोळ्या अधिकाऱ्याकडे
जिल्हा प्रशासनाकडून फायनान्स इतर वित्तीय संस्थांना सक्तीची कर्ज वसुली करू नये, अशा सूचना दिल्या होत्या. मात्र सरकारचे आदेश धाब्यावर बसवून मायक्रो फायनान्स कंपन्या महिला बचत गटांच्याकडून सक्तीने वसुली करताना दिसत आहे. याच्या निषेधार्थ सांगली शहरातील पूरग्रस्त महिलांनी सोमवारी सांगली जिल्हाधिकारी कार्यालयावर धडक मोर्चा काढला.
हेही वाचा... नवी दिल्ली: आयात केलेल्या कांद्याची बाजारपेठेत आवक; घाऊक बाजारात किमती उतरणीला
पूरग्रस्त क्षेत्रातील मायक्रो फायनान्स आणि इतर वित्तीय संस्थांची सक्तीची कर्ज वसुली बंद करावी, फायनान्स कंपन्यांच्या सी.आर.एस. फंडातून कर्जमाफी मिळावी, याकरिता प्रशासनाने हस्तक्षेप करावे. तसेच पूरग्रस्त भागातील महिला, कर्जदार आणि बचतगटाचे पूनर्वसन व्हावे, याकरता राष्ट्रीय बँकांमार्फत मुद्रा योजना आणि मुख्यमंत्री रोजगार निर्मिती योजने अंतर्गत कर्ज प्रकरणे मंजूर करावीत. आदी मागण्या यावेळी आंदोलनकर्त्यांकडून करण्यात आल्या. मायक्रो फायनान्स कंपन्यांच्या सक्तीच्या कर्ज वसुलीबाबत तोंडाला काळ्या फिती लावून निषेध व्यक्त करण्यात आला.
