सांगली - चारा टंचाई आणि तातडीने चारा छावण्या सुरू करण्याच्या मागणीसाठी शेतकरी संघटनेने मणेराजूरी येथे ठिय्या आंदोलन सुरू केले आहे. शासनाचे लक्ष वेधण्यासाठी तासगावच्या तालुकाध्यक्षांनी थेट जनावरांचा गोटा उभारत हे आंदोलन सुरू केले आहे.
तासगाव तालुक्यात निर्माण झालेल्या भीषण पाणीटंचाईमुळे पशूधन संकटात सापडले आहे. जनावरांना लागणारा सुका चारा अपुऱ्या पावसामुळे म्हणावा तसा पिकलाच नाही. त्याचबरोबर शेतीला पाणी नसल्याने ओला चारा मिळणेच कठीण झाले आहे. जिथे ऊसाचे पीक शिल्लक आहे, तिथे त्याचे दर गगनाला भिडले आहेत. यामुळे पशू पालकांनी जनावरे जगवायची कशी, हा मोठा यक्ष प्रश्न निर्माण झाला आहे.
यासंदर्भात शासनाकडून पुढाकार घेऊन मार्ग काढणे जरूरीचे होते. परंतु तसे काही होत नसल्याने तासगाव तालुक्याबाबत शासनाला जाग यावी, म्हणून शेतकरी संघटनेचे तासगाव तालुका अध्यक्ष बाळासाहेब पवार हे चक्क जनावरांच्या गोठ्यात उपोषणाला बसले आहेत. तासगावच्या मणेराजूरी येथे शिकोबाच्या डोंगराच्या पायथ्याशी तात्पुरत्या स्वरूपाचा गोठा उभारत त्याठिकाणी आपली जनावरे बांधून गोठ्यात ठिय्या आंदोलन सुरू केले आहे.
एक महिना उलटूनही प्रशासनाकडून जनावरांच्या चाऱ्याबाबत कोणत्याच प्रकारच्या हालचाली होत नाहीत. त्यामुळे तालुक्यातील जनावरांच्या चाऱ्याकडे आणि छावण्या सुरू करण्याकडे शासनाचे लक्ष वेधण्यासाठी आपण हे आंदोलन सुरू केल्याचे बाळासाहेब पाटील यांनी यावेळी सांगितले. तसेच जोपर्यंत निर्णय होत नाही, तोपर्यंत हे उपोषण चालूच राहणार असल्याचेही त्यांनी स्पष्ट केले.
