सांगली- नितीन गडकरी यांनी साखर कारखानदारांना ईथेनॉल निर्मिती करण्याचे आवाहन केले होता. यावर गडकरी आणि त्यांच्या पक्षाच्या एका तरी नेत्याच्या कारखान्यात ईथेनॉल निर्मिती सुरू आहे का ? असा सवाल शेतकरी संघटनेचे नेते रघुनाथदादा पाटील यांनी केला आहे. पुण्यातील साखर परिषद ही शेतकऱ्यांच्या हिताची नसून केवळ राजकीय परिषद होती, असा आरोप करत पुढील हंगामात ऊस दरासाठी रस्त्यावर उतरण्याचा इशारादेखील पाटील यांनी दिला आहे. ते सांगलीत पत्रकार परिषदेत बोलत होते.
केंद्राचे साखर उद्योग धोरण, पुण्यात पार पडलेली साखर परिषद आणि स्वाभिमानी शेतकरी संघटनेचे माजी खासदार राजू शेट्टी यांच्यावर शेतकरी संघटनेचे नेते रघुनाथदादा पाटील यांनी सडकून टीका केली. आज पाटील यांनी शहरात पत्रकार परिषद घेऊन देशातील साखर उद्योग अडचणीत येणास केंद्र सरकारचे धोरण जबाबदार असल्याचा आरोप केला. तसेच पुणे येथे पार पडलेल्या साखर परिषदेवर टीका करताना केंद्रीय मंत्री नितीन गडकरी, मुख्यमंत्री, राष्ट्रवादीचे नेते शरद पवार आणि राज्यातील साखर कारखानदार यांच्या उपस्थितीत शेतकरी उपयोगी धोरण आणि त्यांच्या हितावर चर्चा न करता, याउलट शेतकऱ्यांना लुटण्यासाठी साखर कारखानदारांना सोबत येण्याचा एक प्रकारचा दबाव टाकण्याचे काम या परिषदेत झाले आहे.
ही साखर परिषद न होता राजकीय परिषद झाल्याची टीका यावेळी पाटील यांनी केली. तसेच नितीन गडकरी हे साखर कारखानदारांना ईथेनॉल निर्मिती करायला सांगतात. मात्र, नितीन गडकरी आणि त्यांच्या पक्षातील व युतीतील किती अमादार, खासदार तसेच मंत्री आपल्या साखर कारखाण्यात ईथेनॉल निर्मिती करतात? असा सवाल रघुनाथदादा पाटील यांनी गडकरींना केला आहे.
त्याचबरोबर रघुनाथदादा पाटील यांनी स्वाभिमानी शेतकरी संघटनेचे माजी खासदार राजू शेट्टी यांच्यावरसुद्धा टीका केली. शरद जोशी यांच्या संघटनेतून बाहेर पडल्यानंतर राजू शेट्टी आमदार, खासदार झाले. या दहा वर्षात ३ टक्के साखरेच्या उताऱ्याची चोरी झाली आहे. यामध्ये शेट्टी सामील असल्याचा आरोप त्यांनी केला आहे. तसेच, साखर कारखानदार यांनी शेतकऱ्यांच्या एफआरपीचे नुकसान केले असून पुढील हंगामात एफआरपी अधिक १ हजार दराच्या मागणीसाठी शेतकरी संघटना रस्त्यावर उतरणार असल्याचे पाटील यांनी सांगितले. त्यावेळी एकही साखर कारखाना, साखर आयुक्त कार्यालय सुरू होऊ देणार नसल्याचा इशारा, रघुनाथदादा पाटील यांनी दिला आहे.
