सांगली- जत तालुक्यातील गोंधळेवाडी येथे जमिनीच्या वादातून झालेल्या मरहाणीत एक तरुण शेतकरी जखमी झाला होता. ही घटना मंगळवारी (३१ मार्च) घडली होती. या तरुणाचा काल उपचारादरम्यान मृत्यू झाला आहे. सुशांत खंडू गळवे (वय १९) असे मृत तरुणाचे नाव आहे.
पोलिसांनी दिलेलेल्या माहितीनुसार, गोंधळेवाडीतील गळवे वस्ती येथील खंडू गळवे यांचा घरासमोरील रस्त्यासंबंधी जमिनीचा वाद आहे. मंगळवारी रात्री त्यांचा मुलगा सुशांत घरासमोर बसला असताना ५ संशयितांनी त्याला काठीने मारहाण केली. या वेळी भांडण सोडवण्यासाठी गेलेले खंडू लक्ष्मण गळवे यांनाही मारहाण करण्यात आली. मारहाणीत खंडू लक्ष्मण गळवे यांचा मुलगा सुशांत गंभीर जखमी झाला होता. त्यानंतर त्याला सांगलीतील खासगी रुग्णालयात उपचाराकरिता दाखल करण्यात आले होते. मात्र, आज उपचारादरम्यान त्याचा मृत्यू झाला.
याप्रकरणी उमदी पोलीस ठाण्यात तक्रार दाखल करण्यात आली होती. पोलिसांनी माळाप्पा गळवे, तुकाराम गळवे, पांडुरंग गळवे, एकनाथ गळवे, बिरप्पा गळवे (सर्वजण रा. गोंधळेवाडी) यांच्यावर गुन्हा दाखल केला आहे. यापैकी तुकाराम गळवे आणि पांडुरंग गळवे हे फरार असून बाकी सर्वांना अटक करण्यात आले आहे. या घटनेमुळे गोंधळेवाडी परिसरात खळबळ उडाली असून अधिक तपास पोलीस उपनिरीक्षक नामदेव दांडगे करत आहेत.
हेही वाचा- कोरोना बाबत सोशल मीडियावर अफवा पसरवणे भाजप पदाधिकाऱ्याला पडले महाग, पोलिसांनी ठोकल्या बेड्या
