रत्नागिरी - तिवरे धरणाच्या भिंतीचे बांधकाम व्यवस्थित न झाल्यामुळे धरण फुटल्याची शक्यता असल्याचे जलसंधारण विभागाच्या अधिकाऱ्यांनी सांगितले. यासंबंधी ग्रामस्थांनी जलसंधारण खात्याला वेळोवेळी पत्रव्यवहार केला होता. त्यामुळे आता धरण फुटल्यानंतर पाटबंधारे अधिकाऱ्यांकडे संशयाची सुई वळली आहे. त्यामुळे जलंसंधारण विभागाच्या अधिकाऱ्यांनी धरणाबाबतचा खुलासा केला आहे.
काय आहे नेमकी तिवरे धरण दुर्घटना? वाचण्यासाठी इथं क्लिक करा....
तिवरे धरणाचे बांधकाम २००४ साली पूर्ण झाले. त्यानंतर गेल्या फेब्रुवारी महिन्यात धरण खचल्याचे पत्र मिळाले. त्यानंतर माती आणून त्याठिकाणी उतारात पडलेला खड्डा बुजवण्यात आला. गेल्या १ तारखेला धरण फक्त २५ ते ३० टक्केच भरले होते. मात्र, २ तारखेला कोयना परिसरातील नौजा येथे १९० मिलीमिटर पाऊस पडला. त्यामुळे पाण्याची पातळी अचानक ९ मीटरने वाढली. त्यामुळे सांडवा भरून वाहू लागला. अचानक पाण्याची पातळी वाढल्याने ओली माती आणि कोरडी माती यांच्यामध्ये जो काही समन्वय साधला जातो त्यामध्ये फरक पडला असावा. त्यामुळे हे धरण फुटल्याची शक्यता असल्याचे जलसंधारण विभागाच्या अधिकाऱ्यांनी सांगितले.
