रत्नागिरी - यांत्रिक मासेमारीवर सध्या 2 महिने बंदी घालण्यात आहे. मात्र, तरीही बंदी आदेश मोडून समुद्रात अवैधरित्या मासेमारी सुरू असल्याचे पाहायला मिळत आहे. आज रत्नागिरीतील भाट्ये समुद्रकिनाऱ्यापासून काही अंतरावर समुद्रात अशाच पद्धतीने अवैध मासेमारी सुरू होती. त्यामुळे अशा बोटींवर कडक कारवाई करण्याची नागरिकांकडून मागणी होत आहे.
यांत्रिकी पद्धतीने होणाऱ्या 1 जूनपासून मासेमारीवर बंदी घालण्यात आली आहे. महाराष्ट्र सागरी मासेमारी अधिनियमानुसार 1 जून ते 31 जुलै 2019 या 61 दिवसांसाठी महाराष्ट्र राज्याच्या जलधी क्षेत्रात यांत्रिकी मासेमारी नौकांना बंदी घातली आहे. या कालावधीत मासळीच्या जीवांना प्रजोत्पादनास पोषक वातावरण असते. या कालावधीत मासेमारी बंदीमुळे मासळीच्या बीजनिर्मिती प्रक्रियेस वाव मिळून मासळीच्या साठ्यांचे जतन होते.
त्यामुळे 2015 सालापासून देशभरात एकाच दिवशी म्हणजे 1 जूनपासून 31 जुलैपर्यत केंद्रसरकाकडून यांत्रिक मासेमारीवर बंदी घातली जाते. मात्र, असे असतानाही नौका बंदीचा आदेश झुगारून समुद्रात नौका मासेमारी करत असल्याचे गेल्या काही दिवसात आढळून आले आहे. मिरकरवाडा बंदरातही मत्स्यव्यवसाय सहाय्यक आयुक्त कार्यालयाच्या पथकाने आतापर्यंत अशा 10 नौकांवर कारवाई केली होती, त्यामुळे अशा नौकांवर आणखी कडक कारवाई करण्याची गरज आहे.
