रायगड - विधानसभा निकाल लागून वीस दिवस उलटले तरी सरकार स्थापन झाले नाही म्हणून राष्ट्रपती राजवट राज्यात लागू झाली. शिवसेना भाजप युती मुख्यमंत्री पदावरून तुटली आहे. आता शिवसेना, राष्ट्रवादी काँग्रेस आणि काँग्रेस असे तीन पक्ष एकत्र येऊन सरकार स्थापन होण्याची शक्यता आहे. मात्र या सरकारने जिल्ह्यातील राजकारण पूर्ण बदलणार असून भाजप हा पक्ष जिल्ह्यात एकटा पडण्याची शक्यता निर्माण झाली आहे. तर शेकापचा एकही विधानसभा सदस्य नसल्याने त्यांना ही कुठे तरी या परिस्थितीचा फटका बसण्याची शक्यता आहे.
विधानसभा निवडणुकीत जिल्ह्यात सात मतदारसंघात आघाडी विरुद्ध युती अशी लढत झाली. यामध्ये युतीने ५, आघाडी १ आणि अपक्ष १ असे उमेदवार निवडून आले आहेत. विधानसभा निवडणुकीत राजकीय पक्ष एकमेकांसमोर लढले आहेत. मात्र आताच्या राजकीय समीकरणामुळे विरोधात लढलेले शिवसेना, राष्ट्रवादी काँग्रेस, काँग्रेस हे सरकार स्थापन करीत आहेत. त्यामुळे या पक्षांची आघाडी झाली तर कार्यकर्ते एकत्र येतील की नाही हा एक प्रश्न उपस्थित होत आहे.
हेही वाचा - पनवेलचे महापौरपद खुल्या गटातील महिलेकडे; कोणाला मिळणार मान?
रायगड जिल्ह्यातील राजकारण हे नेहमी युती, आघाडी विरुद्ध शेकाप असे असले तरी राष्ट्रवादी काँग्रेस आणि शेकाप यांची जिल्ह्यात आघाडी आहे. तर विधानसभा निवडणुकीत शेकाप हा आघाडी सोबत आहे. मात्र असे असले तरी जिल्ह्यात शेकाप विरोधी भूमिका शिवसेना, भाजप आणि काँग्रेसची प्रत्येक निवडणुकीत असते. राष्ट्रवादी काँग्रेस आणि शेकाप आघाडी असून जिल्हा परिषदमध्ये आघाडीची सत्ता आहे.
हेही वाचा - अनधिकृत बांधकामावर होणाऱ्या कारवाईने स्थानिकांच्या रोजगारावर होणार परिणाम
जिल्हा परिषदेमध्ये राष्ट्रवादी काँग्रेस, शेकाप आणि काँग्रेस अशी आघाडी आहे. राज्यात शिवसेना, राष्ट्रवादी काँग्रेस आणि काँग्रेस हे एकत्रित सरकार स्थापन करीत असल्याने जिल्हा परिषदेच्या अध्यक्ष पदाच्या निवडणुकीत यावेळी काही बदल होईल का अशी शंका उपस्थित केली जात आहे. जिल्हा परिषदेत शिवसेना ही विरोधी बाकावर बसलेली असली तरी राज्यातील तीन पक्षाच्या आघाडीने जिल्हा परिषदेतील समीकरणे बदलण्याची शक्यता आहे. भाजप आणि शेकाप हे विरोधी बाकावर बसणार असल्याचे सांगितले जात आहे.
