रायगड - राजकीय लोकप्रतिनिधी फायद्यासाठी एकत्र येऊन आघाडी, युती करीत असतात. अशीच आघाडी रायगडमध्ये सध्या पाहायला मिळत आहे. एकमेकांचे पारंपरिक कट्टर राजकीय विरोधक असणारे काँग्रेस, राष्ट्रवादी काँग्रेस व शेकाप पक्षाचे नेते एकाच व्यासपीठावर पाहण्याचा योग रायगडकर सध्या अनुभवत आहेत.
२०१९ च्या लोकसभा निवडणुकीत पुन्हा काँग्रेस, राष्ट्रवादी काँग्रेस यांच्यात आघाडी झाली आहे. आघाडीमधून सुनील तटकरे यांना उमेदवारी जाहीर झाली. शेकापही आघाडीत सामील झाला आहे. याबाबत, अलिबाग व पेणमधील काँग्रेस नेत्यांनी विरोध केला होता. पेणचे काँग्रेसचे माजी मंत्री रवींद्र पाटील यांनी भाजपात प्रवेश केला आहे. तर, अलिबागचे काँग्रेसचे माजी आमदार हे शेकापचे जयंत पाटील व राष्ट्रवादी काँग्रेसचे सुनील तटकरे यांच्यावर नाराज होते. मधुकर ठाकूर यांची नाराजी मिटविण्यात सुनील तटकरे यांना यश आले आहे. तर, काँग्रेसचे जिल्हाध्यक्ष व माजी आमदार माणिक जगताप हे सुद्धा तटकरे यांना निवडणुकीत मदत करण्यास सरसावले आहेत.
लोकसभा निवडणुकीच्या अनुषंगाने काँग्रेसचे माणिक जगताप, मधुकर ठाकूर, शेकापचे आमदार जयंत पाटील, आमदार पंडित पाटील, माजी आमदार मीनाक्षी पाटील, सुनील तटकरे यांच्यासह काँग्रेस, शेकाप, राष्ट्रवादी पदाधिकारी, कार्यकर्ते एकत्र व्यासपीठावर तसेच सुनील तटकरेचा प्रचार करताना जिल्ह्यात दिसत आहेत.
जिल्ह्यात शेकाप हा काँग्रेस, राष्ट्रवादी काँग्रेस व शिवसेना यांचा १ नंबरचा राजकीय शत्रू मानला जातो. शेकापचे सरचिटणीस आमदार जयंत पाटील यांचे राज्याच्या राजकारणात मोठे वजन असल्याने त्यांना शह देणे आजपर्यत कोणालाच जमलेले नाही. अलिबागचे काँग्रेसचे माजी आमदार मधुकर ठाकूर हे नेहमी शेकापवर आरोप करत असतात. तर, सुनील तटकरे हे सुद्धा शेकापच्या विरोधात होते. मात्र, रायगड जिल्हा परिषदेच्या निवडणुकीत राष्ट्रवादी काँग्रेसचे सुनील तटकरे व शेकापचे जयंत पाटील यांच्यात मनोमिलन झाले होते. त्यानंतर, रायगड जिल्हा परिषदेत दोन्ही पक्षाची सत्ता आली होती.
जिल्ह्यातील काँग्रेस, राष्ट्रवादी काँग्रेस, शेकाप यांच्यातील नेत्यांची आघाडी झाली आहे. परंतु, कार्यकर्ते ही आघाडी कितपत स्वीकारतील हे मात्र २५ मे च्या लोकसभा निकालानंतर कळणार आहे. मात्र तूर्तास तरी राजकारणाच्या या लढाईत एकमेकांचे शत्रू असणारे नेते एकत्र आल्याने जिल्ह्यात चर्चा होत आहे.
