पेण (रायगड) - पेण नगरपालिकेच्या ( Pen Nagar Panchayat ) कारभाराबाबत आमच्यावर कितीही आरोप करा अथवा आपण कितीही उलट सुलट कारस्थाने केलीत, तरी पेण पालिकेवर पुन्हा एकदा आमची भाजपचीच सत्ता स्थापन होणार असून आम्हीच विजयाची हट्रिक ( Bjp will win Pen Nagar Panchayat ) पूर्ण करणार आहोत, असा विश्वास पेण नगरपरिषदेचे नगरसेवक अजय क्षीरसागर ( Pen Nagar Panchayat Corporator Ajay Kshirsagar ) यांनी व्यक्त केला. तसेच गोर गरीब जनतेच्या कोट्यावधी रुपयांचा भ्रष्टाचार आपण पेण अर्बन बँकेत केलात. अशा प्रकारचे भ्रष्टाचार करणे हे आमच्या रक्तातच नाही, प्रत्युत्तरही त्यांनी पेण अर्बन बँकेचे माजी संचालक शिशिर धारकर यांना दिले. ते पत्रकार परिषदेत बोलत होते.
शिशिर धारकर यांनी पेण पालिकेच्या भ्रष्टाचारासंदर्भात पत्रकार परिषदेतून सत्ताधाऱ्यांवर आरोप केले होते. त्यावर बोलताना नगरसेवक अजय क्षीरसागर यांनी बोलताना सांगितले की, शिशिर धारकर हे पेण अर्बन बँक घोटाळ्यातील मुख्य आरोपी आहेत. त्यांनी विद्यमान आमदार आणि राज्याचे माजी कॅबिनेट मंत्री रविशेठ पाटील यांच्यावर केलेले आरोप म्हणजे एक प्रकारचा बालिशपणा आहे. त्यांच्या या बेताल वक्तव्याचा आम्ही पेण शहर भाजपच्या वतीने जाहीर निषेध करीत आहोत. पेण पालिकेचा कारभार हा पूर्णपणे स्वच्छ असून मागील दहा वर्षात आम्ही केलेली विकासकामे हे याचे ज्वलंत उदाहरण आहे.
हेही वाचा - Mask Free Maharashtra : महाराष्ट्र मास्कमुक्तीवर मुख्यमंत्री उद्धव ठाकरेंचे स्पष्टीकरण
याउलट ज्यावेळी पेण अर्बन बँक घोटाळा उघडकीस आला त्यावेळी आपणच रविशेठ पाटील यांच्या घरी पायघड्या घातल्या होतात. त्यावेळी सर्व राजकीय मतभेद बाजूला ठेवून तत्कालीन सहकार मंत्री हर्षवर्धन पाटील यांच्याकडे केवळ ठेवीदारांच्या हिताचा विचार करून आणि त्यांच्या कष्टाच्या पैशाचा विचार करून रविशेठ पाटलांनी मिटिंग लावून दिली. त्यावेळी आपणच दर महिन्याला पन्नास कोटी रुपये भरण्याचा शब्द दिला होतात. पण आज बारा वर्षे झाली एक रुपया तरी आपण भरलात का? आधी आपण हे पैसे भरा आणि मगच जनतेसमोर या, असेही त्यांनी सांगितले. आमदार रविशेठ पाटील यांच्याबाबत काही बोलाल तर ते सहन करून घेतले जाणार नाही. त्याबाबत पेण शहर भाजपच्या वतीने सडेतोड उत्तर दिले जाईल, असा इशारा देखील नगरसेवक अजय क्षीरसागर यांनी घेतलेल्या पत्रकार परिषदेतून देण्यात आला. या पत्रकार परिषदेला माजी नगरसेवक बाळासाहेब जोशी, माजी नगरसेवक प्रशांत ओक, पेण शहर युवा मोर्चा अध्यक्ष मितेश शहा व पदाधिकारी उपस्थित होते.
