रायगड - फरार हिरे व्यापारी नीरवमोदी याचा किहीम येथील रुप्पन्या बंगला शुक्रवारी ८ मार्च रोजी स्फोटकाने उडवून जमीनदोस्त करण्यात येणार आहे. यासाठी जिल्हा प्रशासनाकडून पूर्ण तयारी झाली आहे. उद्या ९ ते १० वाजेपर्यत हा बंगला जमीनदोस्त होणार आहे.
नीरवमोदी यांचा किहीम येथील ३० हजार स्केअर फुटचा बंगला जिल्हाधिकाऱ्यांनी सीआरझेडचे (किनारी क्षेत्र) उल्लंघन केल्याबद्दल अनधिकृत ठरवला होता. त्यानंतर १७ डिसेंबर रोजी जिल्हा प्रशासनाकडून बंगल्यावर कारवाईला सुरुवात करण्यात आली होती. यासाठी जेसीबी व पोकलेनच्या साहाय्याने पाडण्याचे काम सुरू केले होते. मात्र बंगल्याचे बांधकाम मजबूत असल्याने जेसीबीच्या साहाय्याने पाडणे कठीण जात होते. त्यामुळे हा बंगला स्फोटाकाने पाडण्याचा निर्णय जिल्हा प्रशासनाकडून घेण्यात आला होता.
नीरवमोदी यांच्या बंगल्याची लोणारे येथील डॉ. बाबासाहेब आबेडकर अभियांत्रिकीच्या पथकाने पाहणी करून स्फोटाने पाडण्याचा अभिप्राय दिला होता. त्यानुसार ४ मार्च रोजी निरव मोदी यांच्या बंगलास्फोटाने उडविण्याची कारवाई सुरू करण्यात आली.
स्फोटके लावण्याचे काम दोन दिवसांपासून चालू आहे. स्फोटके लावण्यासाठी बंगल्याच्या आतील खांब सुट्टे करून त्याला पोकलनच्या साहाय्याने प्रत्येकी तीन होल पाडण्यात आले आहेत. या पाडलेल्या होल मध्ये स्फोटके भरून जमीनदोस्त करण्यात येणार आहे. यासाठी बंगल्यामध्ये वीस ते पंचवीस कर्मचारी काम करीत आहेत. यावेळी जिल्हा प्रशासनाचे अधिकारी, महसूल, पोलीस, बांधकाम कर्मचारी मोठ्या संख्येने उपस्थित राहणार आहेत.
