रायगड - वाढदिवसानिमित्त मटणाची पार्टी कार्यालयात साजरी करणाऱ्या महाड पंचायत समिती गटविकास अधिकारी प्रशांत गोडाबे याना चांगलीच महागात पडली आहे. या प्रकरणी त्यांच्यावर निलंबनाची कारवाई करण्यात आली आहे. रायगड जिल्हा परिषदेचे मुख्य कार्यकारी अधिकारी दिलीप हळदे यांनी गोडाबे यांच्यावर निलंबनाची कारवाई केली आहे. मात्र, इतर अधिकारी, कर्मचारी आणि राजकीय पदाधिकारी यांच्यावर काय कारवाई केली जाणार? याकडे आता जिल्ह्याचे लक्ष लागले आहे.
कार्यालयातच मटण पार्टी करणे गटविकास अधिकाऱ्याला पडले महाग, झाली निलंबनाची कारवाई महाड पंचायत समिती गटविकास अधिकारी प्रशांत गोडाबे यांचा 29 एप्रिलला वाढदिवस होता. यानिमित्ताने गोडाबे यांनी पंचायत समिती कार्यालयातच वाढदिवस साजरा करून मटणाची पार्टीचे आयोजन केले. या मटणाच्या पार्टीला अधिकारी, कर्मचारी आणि राजकीय पदाधिकारी यांनी मटणावर ताव मारला. कोरोनाचे संकट असताना जबाबदाऱ अधिकाऱ्यांनी अशा पद्धतीने वागणे हे योग्य नाही. या प्रकाराबाबत मीडियात बातम्या प्रसिद्ध झाल्या होत्या. त्यामुळे याची दखल प्रशासनाला घ्यावी लागली.महाड प्रांताधिकारी विठ्ठल इनामदार यांनी 29 एप्रिलला गोडाबे यांना कारणे दाखवा नोटीस बजावली होती. रायगड जिल्हा परिषदेचे मुख्य कार्यकारी अधिकारी यांनी गोडाबे यांच्यावर आज निलंबनाची कारवाई केली. त्यामुळे गोडाबे यांना मटणाची दिलेली पार्टी ही चांगलीच महागात पडली आहे.
