अर्णब यांना जेल अधीक्षकांनीच दिला मोबाईल; निलंबित पोलीस कर्मचाऱ्यांचा आरोप

अर्णब गोस्वामी यांना न्यायालयीन कोठडीत असताना जिल्हा कारागृह अधीक्षक ए टी पाटील यांनीच आपला स्वतःचा मोबाईल बोलण्यासाठी दिला होता. मात्र, आम्ही विरोध केल्याने उलट आमच्यावरच निलंबनाची कारवाई केली असल्याचा आरोप सुभेदार अनंत भेरे आणि जेल पोलीस सचिन वाडे यांनी केला आहे.

रायगड - राज्यात सध्या जामिनावर बाहेर आलेल्या अर्णब गोस्वामी यांना कारागृहात मोबाईल उपलब्ध करून दिलेल्या प्रकरणावरही चर्चा होत आहे. अर्णब गोस्वामी यांना न्यायालयीन कोठडीत असताना जिल्हा कारागृह अधीक्षक ए टी पाटील यांनीच आपला स्वतःचा मोबाईल बोलण्यासाठी दिला होता, असा आरोप निलंबित करण्यात आलेल्या सुभेदार अनंत भेरे आणि जेल पोलीस सचिन वाडे यांनी केला आहे. ए टी पाटील यांनी आम्हाला बळीचा बकरा केला असल्याचेही दोघांनी म्हटले आहे. त्यामुळे अर्णब गोस्वामी मोबाईल प्रकरणात जिल्हा कारागृह अधीक्षक ए टी पाटील याच्यावर संशयाची सुई निर्माण झाली आहे.

अर्णब गोस्वामी, फिरोज शेख आणि नितेश सरडा याना अन्वय नाईक आत्महत्या प्रकरणात रायगड पोलिसांनी अटक केली होती. तिघांनाही 14 दिवसांची न्यायालयीन कोठडी अलिबाग न्यायालयाने सुनावली होती. त्यामुळे अर्णबसह दोघांना अलिबाग नगरपरिषद मराठी शाळा एक नंबर मध्ये कैद्यासाठी तयार करण्यात आलेल्या कोविड सेंटर मध्ये ठेवण्यात आले होते. यावेळी 6 नोव्हेबरला अर्णब गोस्वामी यांना मोबाईल दिल्याचा प्रकार उघडकीस आला होता. त्यानंतर त्याला तळोजा कारागृहात हलविण्यात आले.सुभेदार अनंत भेरे आणि जेल पोलीस सचिन वाडे यांच्यावर निलंबनाची कारवाई-अर्णबला मोबाईल कोणी दिला? याबाबत जिल्हा कारागृह अधीक्षक ए टी पाटील यांनी चौकशी लावली होती. या चौकशीत कोव्हिड सेंटर जेलचे सुभेदार अनंत भेरे आणि जेल पोलीस सचिन वाडे या दोघांनी आधीच्या कैद्यांना मोबाईल दिल्याचे समोर आल्याने दोघांवर निलंबनाची कारवाई करण्यात आली. मात्र त्यांनी अर्णबला मोबाईल दिला नसल्याचेही चौकशीअंती ए टी पाटील यांनी स्पष्ट केले होते.मी जेल अधीक्षक आहे-सुभेदार अनंत भेरे आणि जेल पोलीस सचिन वाडे या दोघांनीही आमच्यावर केलेली कारवाई अन्यायकारक असल्याचे म्हटले आहे. तसेच पाटील यांनीच आम्हाला बोलावून पेपरवर सह्या घेत निलंबित केले असल्याचे सांगितले. मात्र ए टी पाटील यांनी स्वतःचा मोबाईल अर्णब याला बोलण्यासाठी दिला होता. मी याबाबत आक्षेप घेतला असताना तू शिपाई आहेस, मी जेल अधीक्षक आहे, असे म्हणाले असल्याचे स्पष्टीकरण सचिन वाडे यांनी दिले आहे.

मोबाईल आणि इतर सुविधा पाटील यांनी पुरविल्या आणि कारवाई आमच्यावर

अर्णब गोस्वामी यांना मोबाईल, बिसलेरी, बिछाना, ओडोमास या सर्व गोष्टी जिल्हा कारागृह अधीक्षक ए टी पाटील यांनीच पुरविल्या असून त्याच्यावरच कारवाई होणे अपेक्षित आहे. मात्र आमच्यावर कारवाई केली आहे. अशी प्रतिक्रिया सुभेदार अनंत भेरे यांनी दिली आहे.