पेण-खोपोली रस्त्यावर दरोडा टाकणारी आंतरराज्य टोळी जेरबंद

14 सप्टेंबर रोजी सुप्रीम कंपनीतून चंद्रकांत गुंगे हे 25 लाख 77 हजार 288 रुपये किमतीचा प्लास्टिक दाण्याचा माल ट्रकद्वारे (केए 56/ 3438) नागोठणे येथून चेन्नईकडे घेऊन निघाले होते. पेण-खोपोली रस्त्यावर सायंकाळी साडेसात वाजण्याच्या सुमारास गागोदे खिंड येथे ट्रक आला असता, सात ते आठ जणांनी आपली झायलो कार ट्रकच्या पुढे आडवी घालून ट्रक अडवला. प्रवाशांची लूटमार करून त्यांना गवतात फेकून देऊन सर्वजण पसार झाले.

रायगड - पेण-खोपोली रस्त्यावर दरोडा टाकून पळालेल्या आंतरराज्यीय टोळीला जेरबंद करण्यात पेण पोलिसांना यश आले आहे. पेण पोलिसांनी दरोडा प्रकरणात सहा आरोपींना अटक केली असून 40 लाख 98 हजार 788 रुपये किमतीचा मुद्देमाल जप्त केला आहे. या प्रकरणातील 3 आरोपी फरार असून त्यांचा तपास पेण पोलीस करीत आहेत. पकडलेल्या आरोपींना पेण न्यायालयात हजर केले असता त्यांना 1 ऑक्टोबरपर्यंत पोलीस कोठडी सुनावली आहे.

पेण दरोडा प्रकरणातील तपासाबाबत अलिबाग जिल्हा पोलीस मुख्यालयात पत्रकार परिषद आयोजित करण्यात आली होती. अप्पर पोलीस अधीक्षक सचिन गुंजाळ यांनी कारवाईविषयी माहिती दिली.

14 सप्टेंबर रोजी सुप्रीम कंपनीतून चंद्रकांत गुंगे हे 25 लाख 77 हजार 288 रुपये किमतीचा प्लास्टिक दाण्याचा माल घेऊन ट्रेकद्वारे (केए 56/ 3438) नागोठणे येथून चेन्नईकडे निघाले होते. पेण-खोपोली रस्त्यावर सायंकाळी साडेसात वाजण्याच्या सुमारास गागोदे खिंड येथे ट्रक आला असता, सात ते आठ जणांनी आपली झायलो कार ट्रकच्या पुढे आडवी घालून ट्रक अडवला. त्यानंतर आरोपींनी ट्रकमध्ये घुसून फिर्यादी आणि दोन साक्षीदार याना मारहाण करून ट्रक ताब्यात घेतला. आरोपींनी झायलो कारमध्ये चालक आणि साक्षीदारांना कोंबून त्यांचा मोबाईल, पैसे घेऊन दोन तीन तासांनी फिरवून इरवाडी पेट्रोल पंपाजवळील गवतात फेकून देऊन पसार झाले. या घटनेबाबत गुंगे यांनी पेण पोलीस ठाण्यात झालेला प्रकार सांगितला. त्यानंतर पोलिसांनी दरोड्याचा गुन्हा दाखल केला.

हेही वाचा - रायगड : पोलीस स्टेशनजवळील एटीएम फोडून 29 लाख चोरट्यांकडून लंपास

पेण पोलिसांनी गुन्हा दाखल केल्यानंतर 4 पथके तयार करून शोध सुरू केला. तपासादरम्यान नाशिक जिल्ह्यातील मालेगाव परिसरात एक बेवारस ट्रक स्थितीत आढळून आला. नाशिक विभागात असे गुन्हे करणाऱ्यांची अधिक माहिती घेतली त्यावेळी आरोपीचा तपास लागला. त्यानुसार सदानंद मुरलीधर अमृतकर या मुख्य आरोपीला अटक केली. त्याची चौकशी केल्यानंतर त्याने गुन्ह्याची कबुली दिली. शहनशाह उर्फ सेबु गुल हसन (20), महंमद जावीर शरीक शेख (28), हंसराज उर्फ मन्नू मुनेश्वर (48), महंमद जाकीर महंमद इलियास (20), बंटी उर्फ रोशन सुभाष खाबिया (33) (सर्व राहणार उत्तरप्रदेश) या सहा जणांना नाशिक, मुंबई येथून अटक केली. दरोड्यात लुटलेला माल, झायलो कार, ट्रक असा 45 लाख 34 हजार 288 रुपयांचा मुद्देमाल आरोपींकडून जप्त केला आहे.

जिल्हा पोलीस अधीक्षक अनिल पारस्कर, अप्पर पोलीस अधीक्षक सचिन गुंजाळ, उपविभागीय पोलीस अधीक्षक नितीन जाधव यांच्या मार्गदर्शनाखाली पेण पोलीस निरीक्षक बी. एस. जाधव, पोलीस उपनिरीक्षक महेश कदम, नरेंद्र पाटील, सहायक फौजदार भास्कर पाटील, पोलीस हवालदार पी. के. दौरे, राजेंद्र भोनकर, पोलीस नाईक संदीप देसाई, पोलीस शिपाई कैलास बेल्हेकर यांनी कामगिरी पार पाडली.

हेही वाचा - स्थानिक गुन्हे शाखेने 1 कोटी 88 लाखाचे रक्तचंदन केले जप्त; 3 जणांना अटक