रायगड - जिल्ह्यात आठवडाभरा पासून मुसळधार पाऊस व पुर परिस्थिती आहे. जिल्हा प्रशासन सर्वत्र लक्ष ठेऊन काळजीपुर्वक परिस्थिती हाताळत आहेत. जिल्ह्याचे पालक असलेले पालकमंत्री रवींद्र चव्हाण, यांना मात्र जिल्ह्यातील पूर परिस्थितीचे गांभीर्य नसल्याचे दिसत आहे. रवींद्र चव्हाण अजूनही जिल्ह्यात आलेले नाहीत. त्यामुळे पालकमंत्र्यांच्या अशा वागण्यावर रायगडकर नाराजी व्यक्त करीत आहेत.
जिल्ह्याचे पालकमंत्री गेले कुठे? पूरग्रस्त रायगडकरांना पडला प्रश्न जिल्ह्यात 4 ऑगस्टपासून मुसळधार पाऊस पडत आहे. या पावसात पेण, महाड, पोलादपूर, माणगाव, म्हसळा, तळा, श्रीवर्धन, अलिबाग या तालुक्यांत पूरस्थिती निर्माण झाली. पेण तालुक्यातील अंतोरे, कणे, वाशी, बोर्जे, वढाव या गावांना पुराच्या पाण्याने वेढले होते. शेकडो नागरिक पुराच्या पाण्यात अडकलेले होते. जिल्हा प्रशासन व पेण प्रशासनातर्फे एनडीआरएफ, कोस्ट गार्ड, स्थानिक संस्था याच्या मदतीने पुरात अडकलेल्या नागरिकांना सुखरूप स्थळी हलवण्यात आले आहे.मुसळधार पावसाने अनेक भागांत दरडी कोसळल्या, घरांचे नुकसान झाले. अनेक ठिकाणी रस्ते वाहून गेले आहेत. त्यामुळे अनेक गावांचा संपर्क तुटलेला आहे. जिल्ह्यात कोणतीही जीवितहानी झालेली नसली तरी करोडोंची वित्तहानी झाली आहे.जिल्ह्यात पावसाने हाहाकार माजवला असताना जिल्ह्याचे पालकत्व स्वीकारलेले पालकमंत्री रवींद्र चव्हाण हे मात्र जिल्ह्यात फिरकलेच नाहीत. एरवी पक्षाच्या राजकीय कामांसाठी चव्हाण जिल्ह्यात येतात. आत्ता जिल्ह्यात कठीण परिस्थिती उद्भवली असताना त्यांनी जिल्ह्यातील पूर भागाचा दौरा करून पाहणी करणे गरजेचे आहे.
